02-10-2020
14:25
یۆنامی: دڵتەنگین بە کۆچی دوایی بابەشێخ
جێنین هێنیس-پلاسخارت، نوێنەری تایبەتی سکرتێری گشتیی نەتەوە یەکگرتووەکان لە عێراق لەگەڵ بابەشێخ
نوێنەرایەتیی نەتەوە یەکگرتووەکان لە عێراق "یۆنامی" بەبۆنەی کۆچی دوایی بابەشێخ، رابەری رۆحیی کوردانی ئێزدی، پەیامێکی بڵاوکردەوە، تێیدا هاتووە "دڵتەنگین بە کۆچی دوایی بابەشێخ، رابەری رۆحیی کۆمەڵگەی ئێزدی لە عێراق و جیهان. پرسە و سەرەخۆشیی خۆمان ئاراستەی بنەماڵەی بابەشێخ و خەڵکی ئێزدی دەکەین".
لە پەیامی نوێنەرایەتیی نەتەوە یەکگرتووەکان لە عێراق ئاماژە بەوەش کراوە، بابەشێخ "رەمزێکی یەکگرتوویی بوو لەنێو کۆمەڵگەی ئێزدی کە لە ساڵی 2014 تووشی کارەسات بوون، سەردەبڕدران، لاقە دەکران، دەستبەسەردەکران و وەکو کۆیلە لەلایەن داعشەوە دەفرۆشران".
هەر لەو پەیامەی یۆنامیدا هاتووە، بابەشێخ ئێزدییەکانی لەکاتی نائومێدیدا یەکخستەوە، "لەیادماندا دەمێنێتەوە بۆ هەوڵە بێوچانەکانی بۆ ساڕێژکردنی برینی کۆمەڵگەکەی".
جێنین هێنیس-پلاسخارت، نوێنەری تایبەتی سکرتێری گشتیی نەتەوە یەکگرتووەکان لە عێراق باسی لەوە کردووە، ساڵی رابردوو پەیوەندیی بە بابەشێخ-ەوە کردووە و پرسی کوردانی ئێزدیی لەگەڵدا تاوتوێ کردووە.
10:59
ئەمینداری یەکگرتوو : بابەشێخ کەسایەتییەکی نیشتمانپەروەر بوو
سەلاحەددین بەهائەدین، ئەمینداری گشتیی یەکگرتوو
ئەمینداری یەکگرتووی ئیسلامیی کوردستان بەبۆنەی کۆچی دوایی بابەشێخ، رابەری رۆحیی ئێزدییەکان، پرسەنامەیەکی ئاراستەی بنەماڵەی کۆچکردوو و کوردانی ئێزدی کرد و رایگەیاند "بابەشێخ کەسایەتییەکی نیشتمانپەروەر بوو".
لە بەشێکی پرسەنامەکەی سەلاحەددین بەهائەدین، ئەمینداری گشتیی یەکگرتوودا هاتووە "جەنابی بابەشێخ کەسایەتیەکی ئاشتیخوازو نیشمانپەروەرو دۆستێکی بەرێز بوو، هەمیشە لە کۆششی پێکەوەژیان و ئارامی کۆمەڵایەتیدا بوو".
دەقی پرسەنامەکەی ئەمینداری گشتیی یەکگرتووی ئیسلامی:
ئهمینداری گشتی یهكگرتوو پرسه نامهیهك ئاراستهی خانەوادەو سەرجەم کەسوکارو هاووڵاتیانی ئیزیدی دهكات
بهرێز مامۆستا سهلاحهدین محهمهد بههائهدین ئهمینداری گشتی یهكگرتووی ئیسلامی كوردستان بهبۆنهی كۆچی دوایی بابەشێخ رابەری رۆحی ئیزیدیان پرسهنامهیهك ئاراسته دهكات ئهمه دهقهكهیهتی:
بەبۆنەی کۆچی دوایی جەنابی بابەشێخ رابەری رۆحی هاونیشتمانیانی ئیزیدی، لەناخی دڵمانەوە پرسەو سەرەخۆشی و هاوخەمی خۆمان بۆ بەرێزان خانەوادەی کۆچکردوو جەنابی میری ئیزیدیان وسەرجەم کەسوکارو هاوڵاتیانی ئیزیدی پێشکەش ئەکەین و لەخودا داواکارین رۆحی ئاسودەبێ و بەر رەحمەت ودلۆڤانی خودا کەوتبێ.
جەنابی بابەشێخ کەسایەتیەکی ئاشتیخوازو نیشمانپەروەرو دۆستێکی بەرێز بوو، هەمیشە لە کۆششی پێکەوەژیان و ئارامی کۆمەڵایەتیدا بوو.
کۆتایی خەمتان بێ .
انا للە وانا الیە راجعون
صلاح الدین محمد بهاءالدین
ئهمینداری گشتی یهكگرتووی ئیسلامی كوردستان
2-10-2020
09:21
لە شێخان حەوت رۆژ شیوەن بۆ بابەشێخ دەگێڕدرێت
لە شێخان حەوت رۆژ شیوەن بۆ بابەشێخ دەگێڕدرێت
تەرمی بابەشێخ لە هەولێرەوە بەرەو شێخان بەڕێکرا، بڕیارە لە گوندی بۆزان لەو قەزایە بەخاکبسپێردرێت. پرسەی گشتیی بابەشێخ سێ رۆژە، بەڵام لە قەزای شێخان بۆ ماوەی حەوت رۆژ پرسە و شیوەنگێڕان بۆی، بەردەوام دەبێت.
09:06
تەرمی بابەشێخ لە شێخان بە خاک سپێردرا
بەڕێکردنی تەرمی بابەشێخ
رووداو دیجیتاڵ
شەوی رابردوو شێخ خرتۆ حاجی ئیسماعیل، ناسراو بە بابەشێخ، رێبەری رۆحیی کوردانی ئێزدی لە نەخۆشخانەیەکی هەولێر کۆچی دواییکرد. ئەمڕۆ هەینیش تەرمەکەی دەبرێتەوە شێخان و لەوێ بە خاک دەسپێردرێت.
لە هەولێر تاجەگوڵینەی ماڵئاوایی لەسەر تەرمی بابەشێخ دادەنرێت. د. فرسەت سۆفی، پارێزگاری هەولێر رایگەیاند، بابەشێخ پێگەیەکی گەورەی ئایینی هەیە. "بە رێوڕەسمێکی شایستە تەرمەکەی بەڕێدەکەین بۆ شێخان".
فرسەت سۆفی سەرەخۆشی لە هەموو کوردانی ئێزدی کرد، گوتی "بابەشێخ شایەنی هەموو شتێکی باشە".
خەیری بۆزانی، بەڕێوەبەری کاروباری ئێزدییەکان لە وەزارەتی ئەوقافی هەرێمی کوردستان بە رووداوی گوت، هەموو ئامادەکارییەکان تەواوبوون و لە شێخانیش بە رێوڕەسمێکی "ئایینی شایستە" لە گوندی بۆزا بە خاک دەسپێردرێت.
عیدۆ بابەشێخ، برای بابەشێخ قسەی بۆ رووداو کرد و گوتی، پەیامی ئەوان بۆ کوردانی ئێزدی، خەڵکی هەرێمی کوردستان و عێراق ئەوەیە، "زۆر دڵگرانین، ئەم پیاوە رەمزی ئاشتەوایی، برایەتی و دڵسۆزی بوو".
بابەشێخ رۆڵی گەورەی لە بەخێرهاتنەوەی رفێندراوانی کوردانی ئێزدیی دەستی داعش هەبوو، عیدۆ بابەشێخ، دەڵێت، رۆڵی ئەو وایکرد خێزانەکانی ئەو کچ و ژنە رفێندراوانە، منداڵەکانیان بگرنەوە خۆیان.