رووداو دیجیتاڵ
ساڵێک بەسەر یەکەم کۆبوونەوەی خولی نوێی پەرلەمانی کوردستاندا تێدەپەڕێت و تاوەکو ئەمڕۆ بە کراوەیی هێڵدراوەتەوە. بەڕێوەبەری راگەیاندنی پەرلەمان دەڵێت، کۆبوونەوەی پەرلەمان رێککەوتنی سیاسیی پێویستە.
لە 20-10-2024 هەڵبژاردنی پەرلەمانی کوردستان بەڕێوەچوو؛ 02-12-2024، یەکەم دانیشتنی خولی شەشەمی پەرلەمانی کوردستان کرا و تاوەکو ئەمڕۆ کۆبوونەوەی دیکە نەکراوە.
سامان ئەحمەد، بەڕێوەبەری راگەیاندنی پەرلەمانی کوردستان، ئەمڕۆ سێشەممە بە تۆڕی میدیایی رووداوی گوت: "50+1 پەرلەمانتاران پێویستە بۆ کۆبوونەوەی پەرلەمانی کوردستان، بۆ ئەوەش رێککەوتنی سیاسیی دەوێت و تاوەکو ئەوە نەکرێت کۆبوونەوە ناکرێت".
بەڕێوەبەری راگەیاندنی پەرلەمانی کوردستان ئاماژەی بەوەکرد، رۆژانە بەشێکی پەرلەمانتاران دەوام دەکەن؛ گوتیشی: "لیژنەکان پێکنەهاتوون، ئەوانەی دەوام دەکەن بۆ کۆبوونەوەی فراکسیۆنەکانیان یان پێشوازییە لە میوانان".
دیوانی پەرلەمانی کوردستان ئامادەیە بۆ کۆبوونەوە و چاوەڕێی رێککەوتنی لایەنە سیاسییەکانە.
کۆنەبوونەوەی پەرلەمان لەکاتێکدایە، لە کاتی ئاساییدا، بەگوێرەی بڕگەی سێیەمی مادەی 51ـی پەیڕەوی نێوخۆی پەرلەمانی کوردستان "رۆژانی سێشەممە و چوارشەممە تایبەت دەبێت بە دانیشتنی پەرلەمان".
لە یەکەم دانیشتنی خولی شەشەمی پەرلەمانی کوردستاندا، پارتی دیموکراتی کوردستان دوو بەربژێری بۆ پۆستی سەرۆکی پەرلەمانی کوردستان هەبوون، ئەوانیش ڤالا فەرید و هەڵگورد شێخ نەجیب بوون. یەکێتیی نیشتمانیی کوردستانیش دوو کەسی بۆ پۆستەکە بەربژێر کردبوو، کە میران محەممەد و شاڵاو کۆسرەت رەسووڵ بوون. نەوەی نوێش بەربژێرێکی بۆ سەرۆکی پەرلەمان هەبوو، کە کوردەوان جەمال بوو.
بۆ جێگری سەرۆکی پەرلەمانیش هەریەک لە بەهجەت عەلی و مەرد عەلی رەسووڵ لە پارتی دیموکراتی کوردستان، ئومێد حەمەساڵح و ئازاد حەمەئەمین لە یەکێتیی نیشتمانیی کوردستان، هەروەها عەدنان حوسێن لە نەوەی نوێ خۆیان بەربژێر کرد.
بۆ پۆستی سکرتێری پەرلەمان، شیرین یونس و شلێر غەفوور لە یەکێتی، هاڤین سەعید لە پارتی، سەوسەن کاکەمەند لە نەوەی نوێ، نەجدەت نووری لە پێکهاتەی تورکمان لە سلێمانی و رامی نووری لە پێکهاتەی کریستیان لە هەولێر بەربژێر بوون.
بەگوێرەی پەیڕەوی ناوخۆی پەرلەمان، جارێکی دیکە دەرگەی خۆپاڵاوتن بۆ دەستەی سەرۆکایەتیی پەرلەمانی کوردستان ناکرێتەوە و دەبێت ئەوانەی خۆیان بەربژێر کردووە، یەکێک لەوانە هەڵبژێردرێن بۆ پۆستەکانی سەرۆک، سکرتێر و جێگری سەرۆکی پەرلەمانی کوردستان.
لە هەڵبژاردنی پەرلەمانی کوردستاندا کە 20-10-2024 بەڕێوەچوو، پارتی دیموکراتی کوردستان زۆرترین کورسی بەدەستهێنا کە 39 کورسی بوو. دوای ئەویش یەکێتیی نیشتمانیی کوردستان 23 کورسی و نەوەی نوێ 15 کورسی بەدەستهێنا.