رووداو دیجیتاڵ
لە شەڕی نێوان دەنگدەرانی ئاکپارتی و پارتی دەڤادا لە پارێزگای سێرتی باکووری کوردستان، چوار کەس بریندار بوون؛ دۆخی تەندروستیی یەکێک لە بریندارەکان ناجێگیرە.
رووداوەکە درەنگانی شەوی سێشەممە 2ی نیسانی 2024 لە شارۆچکەی بەرواری سەر بە پارێزگای سێرت روویدا.
لە هەڵبژاردنی شارەوانییەکانی 31ی ئاداری ئەم ساڵدا لە شارۆچكەی بەرواری، تەیار ئۆزجانی بەربژێری ئاکپارتی 52.09%ی دەنگەکانی بەدەستهێنا و ئیسماعیل بیلەنی بەربژێری پارتی دەڤا 39.58%ی دەنگەکانی بردەوە.
بەپێی زانیارییەکان، شەوی رابردوو لە ناوەندی شارۆچکەکە شەڕ لەنێوان لایەنگرانی ئەو دوو پارتەدا روویدا و بە چەک هێرشیان کردە سەر یەکدی. ئەندامانی ئەو دوو پارتە کە بووە بە شەڕیان، خزمی یەکدین.
لە ئەنجامی شەڕەکە چوار کەس برینداربوون و دۆخی تەندروستی یەکێک لە بریندارەکان ناجێگیرە.
ئەو کەسەی بە سەختی بریندار بووە ناوی "ئا. بیلەن"ە و تەمەنی 41 ساڵە و برای ئیسماعیل بیلەنی بەربژێرەکەی پارتی دەڤایە.
دوای رووداوەکە، هێزە ئەمنییەکان رێوشوێنی ئەمنیی تووندیان لە شارۆچکەکە گرتەبەر و تاوەکو کاتێكی نادیار قەدەخەی هاتووچۆ لە تەواوی شارۆچکەکە راگەیێندرا.
قایمقامیەتی سێرت لە راگەیێندراوێکدا گوتی، لە کاژێر 01:00ی رۆژی 3ی نیسان تاوەکو ئاگادارکردنەوەیەکی دیکە، قەدەخەی هاتووچۆ لە سەنتەری شارۆچکەی بەرواری و سەرجەم گوندەکانی راگەیێندراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ