رووداو دیجیتاڵ
ئەمڕۆ دوایین کەمپی ئاوارەکان لە سنووری پارێزگای سلێمانی چۆڵ دەکرێت و دوایین کاروانی ئاوارەکانی کەمپەکە دەگەڕێنەوە زێدی خۆیان.
دابان محەممەد، بەڕێوەبەری ناحیەی عەربەت ئەمڕۆ چوارشەممە 03-07-2024 بە رووداوی گوت، "دوێنێ کاروانێکی ئاوارەکانی کەمپی ئاشتی گەڕانەوە زێدی خۆیان لە شنگال و پارێزگای سەلاحەدین. ئەمڕۆش دوایین کاروانیان دەگەڕێنەوە و بەم شێوەیە کەمپەکە چۆڵ دەبێت."
کەمپی ئاشتی، دەکەوێتە سنووری ناحیەی عەربەت-ی سەر بە پارێزگای سلێمانی.
هەر خێزانێکی ئاوارە کە بگەڕێتەوە، چوار ملیۆن دینار، تەلەڤیزیۆن، تەباخ و بەفرگرێکی پێدەدرێت و ماڵەکەشی بێ بەرامبەر بۆ دەگوازرێتەوە.
بەڕێوەبەری ناحیەی عەربەت دەڵێت، "ئەوە هاندانێکە تاوەکو ئاوارەکان بگەڕێنەوە زێدی خۆیان."
شەممەی رابردوو 179 خێزانی کەمپی ئاشتی گەڕانەوەی زێدی خۆیان لە شنگال و پارێزگای سەلاحەدین. ئەوکات عەلی عەباس، بەرپرسی لقەکان و گوتەبێژی وەزارەتی کۆچ و کۆچبەرانی عێراق بە رووداوی گوت، ژمارەی ئەندامانی ئەو خێزانانەی گەڕانەوە 734 کەس بوون، کە خەڵکی پارێزگاکانی نەینەوا و سەلاحەدین بوون.
ئەنجوومەنی وەزیرانی عێراق رۆژی 30ی تەممووزی ئەم ساڵی وەکو دوا کات بۆ داخستنی کەمپی ئاوارەکان لە هەرێمی کوردستان داناوە.
بەپێی دوایین ئاماری وەزارەتی کۆچ و کۆچبەرانی عێراق، لە هەرێمی کوردستاندا 23 کەمپ هەن.
.jpg&w=3840&q=75)
