پەیامی قوباد تاڵەبانی لەبارەی پێکهێنانی کابینەی نوێی حکومەت: ئامادەین

 

 

قوباد تاڵەبانی، جێگری سەرۆکوەزیرانی هەرێمی کوردستان پێشوازیی لە مایکڵ ریگاس، جێگری وەزیری دەرەوەی ئەمریکا کرد و کۆبوونەوە. بەپێی نووسینگەی جێگری سەرۆکوەزیران، لە کۆبوونەوەکەدا تاوتوێی پەیوەندییەکانی نێوان هەرێمی کوردستان و ئەمریکا و "چەند پرسێکی گرنگی جێی بایەخی هەردوولا" کرا.

 

لە تەوەرێکی کۆبوونەوەکەدا باس لە پێكهێنانی کابینەی نوێی حکومەتی هەرێمی کوردستان کراوە و قوباد تاڵەبانی لەوبارەیەوە گوتوویەتی، "ئامادەین بۆ پێکهێنانی حکومەت لەسەر بنەمای هاوسەنگی و هاوبەشیی راستەقینە، کە بەبێ جیاوازی خزمەتی هەموو هاووڵاتییان و ناوچەکانی هەرێمی کوردستان بکات."

 

سەبارەت بە هێرشکردنە سەر کێڵگەی گازی کۆرمۆر، وەکو لە راگەیێندراوی نووسینگەی قوباد تاڵەبانی دا هاتووە، "هەردوولا هاوڕابوون ئەم هێرشە تیرۆریستییە بە ئامانجگرتنی ژێرخانی ئابووری و وزەی هەرێمی کوردستانە و دەبێت کۆتایی بەم جۆرە هێرشانە بهێندرێت." جێگری سەرۆکوەزیرانی هەرێمی کوردستان گوتووشیەتی، "بەردەوامی و چەندبارەبوونەوەی هێرشەکان بۆسەر ژێرخانی ئابووری و وزەی هەرێمی کوردستان، سەلمێنەری ئەوەیە کە پێویستە ئاستی هەماهەنگیی نێوان هەرێمی کوردستان و ئەمریکا بەردەوام و زیاتر بێت."

 

 

جێگری سەرۆکوەزیرانی هەرێمی کوردستان، پیرۆزبایی کردنەوەی "گەورەترین کۆنسووڵخانەی ئەمریکا"ی کرد لە هەرێمی کوردستان و بە "رووداوێکی گرنگ" ناوی برد، کە ئاماژەیە بۆ "بەهێزی و گرنگیی پەیوەندیی نێوان ئەمریکا و هەرێمی کوردستان."

 

لەبارەی هێزەکانی پێشمەرگە و چاکسازییەکانی وەزارتی پێشمەرگەشەوە، وەکو لە راگەیێندراوەکەدا هاتووە، جەخت کراوەتەوە لەسەر بەردەوامیی هەنگاوەکانی چاکسازی بەو جۆرەی پلانی بۆ دانراوە. قوباد تاڵەبانی رایگەیاندووە، "چاکسازییەکانی وەزارەتی پێشمەرگە قۆناخی باشی بڕیوە." سوپاسی ئەمریکایشی کرد بۆ هاوکاریکردنی هەرێمی کوردستان لەوبارەیەوە، جەختیشی کردەوە لەسەر بەردەوامیی پرۆسەکە تاوەکو ئەو کاتەی هەرێمی کوردستان دەبێتە خاوەنی "هێزێکی راهێندراوی پیشەیی و نیشتمانی و دوور لە هەر چەشنە دەستێوەردان و ئینتمایەکی حیزبی."