رووداو دیجیتاڵ
چەند شۆفێرێک دەڵێن، لە خۆپێشاندانەکەی ئەم هەفتەیەی گوندی لاجان لە رێگەی هەولێر- دهۆک، ناچار بە ئاراستەی پێچەوانە گەڕاونەتەوە و کامێراکانی تیژڕۆیی لە شەقامەکە وێنەی گرتوون و وەک سزا لەسەریان هەژمار دەکرێ. بەڕێوەبەری گشتیی دیوانی وەزارەتی ناوخۆ دەڵێت، کامێراکان خێرایی ئۆتۆمبێل تۆماردەکەن و هەرکەسێکیش گرفتی لەوجۆرەی هەبێت، دەتوانێت داواکاری پێشکێش بە هاتووچۆ بکات.
چەند شۆفێرێک پەیوەندییان بە رادیۆی رووداوەوە کرد و رایانگەیاند، لەخۆپێشاندانی ئێوارەی رۆژی 1ی کانوونی یەکەمی 2025، لە رێگەی هەولێر-خەبات، دەیان ئۆتۆمبێل بە ئاراستەی پێچەوانە گەڕاونەتەوە و کامێراکانی تیژڕۆیی وێنەی گرتوون و داواکارن بە "سەرپێچی بۆیان هەژمار نەکرێ."
بەرپرسێکی وەزارەتی ناوخۆی هەرێمی کوردستان دەڵێ، سەرپێچی ئەو شۆفێرانە تۆمارناکرێ و هەر کەسێکیش گومانی هەبێت، دەتوانێ داواکاری پێشکێش بە بەڕێوەبەرایەتیی هاتووچۆ بکات بۆ ئەوەی بۆی هەژمار نەکرێ.
هێمن میرانی، بەڕێوەبەری گشتیی دیوانی وەزارەتی ناوخۆ بە رادیۆی رووداوی گوت، ئەو هاونیشتمانییانەی کێشەیەکی لەو جۆرەیان هەیە، دەتوانن لە بەڕێوەبەرایەتیی هاتووچۆ داواکاری پێشکێش بکەن، چونکە رووداوەکە کاتەکەی دیارە و لەلایەن بەڕێوەبەرایەتیی هاتووچۆوە پێداچوونەوەی بۆ دەکرێ و بۆیان چارەسەردەکرێ.
بەرپرسەکەی وەزارەتی ناوخۆی هەرێمی کوردستان گوتیشی، کامێراکان تۆمارکردنی تیژڕۆیین، نەوەک ئاراستەی پێچەوانە، تەنیا مەگەر خێراییەکەی زۆربێت، هەر هاونیشتمانییەکیش گرفتی هەبێت دەتوانێت داواکاری پێشکێش بکات و بۆیان چارەسەر دەکرێ.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ