عەلی لاریجانی، سکرتێری ئەنجوومەنی باڵای ئاسایشی نیشتمانیی کۆماری ئیسلامیی ئێران دەڵێت: "با گرووپە جوداخوازەکان وا بیر نەکەنەوە کە شنەیەک هەڵیکردووە (دەرفەتێک رەخساوە) و هەوڵی ئەنجامدانی کارێک بدەن، بە هیچ شێوەیەک چاوپۆشییان لێ ناکەین، دۆخەکە لەژێر کۆنتڕۆڵی هێزە چەکدارەکانماندایە."

تۆماس فریدمان، نووسەری بەنێوبانگی ئەمریکی دەڵێت بۆ ئەوەی لە شەڕی ئێستا لەگەڵ ئێران تێبگەین، دەبێت لەیەک کاتدا چەندین بیرۆکەی جیاواز و دژیەک لە مێشکی خۆتدا دابنێیت. لە دوایین وتاریدا لە رۆژنامەی نیویۆرک تایمز، باسی 4 خاڵی سەرەکیی ئەم دۆخە دەکات کە پێشبینی ناکرێت.

 

 

فریدمان، پێی وایە گۆڕینی ''رژێمی ئایینی لە ئێران'' کارێکی گرنگی ''ئەخلاقی و ستراتیژییە''. ئەو دەڵێت ئەگەر سەرکردایەتییەکی نوێ بێتە سەر کار کە گرنگی بە خەڵکی ئێران بدات نەک دروستکردنی کێشە لە ناوچەکە، ئەوا دەتوانێت هەموو رۆژهەڵاتی ناوەڕاست بەرەو باشتر ببات. بە بڕوای ئەو، نەمانى کۆماری ئیسلامی دەبێتە گەورەترین گۆڕانکاری لە ناوچەکەدا لە ساڵی 1979ـەوە.

 

 

فریدمان، هۆشداری دەدات کە گۆڕینی رژێم تەنیا بە هێرشی ئاسمانی ناکرێت. بۆ نموونە، ئیسرائیل دوای 2 ساڵ شەڕی قورس، هێشتا نەیتوانیوە حەماس لەنێوببات. ئەو دوو مەترسی دەبینێت: یان "کۆماری ئیسلامی بە شێوازێکی نوێ" دروست دەبێتەوە کە تەنیا بۆ مانەوەی خۆی کار دەکات، یان لەوەش خراپتر، وڵاتەکە "دەتەقێتەوە" و دەبێتە چەند پارچەیەکی بچووکی نەتەوەیی، کە ئەمەش کۆتایی بە ئێرانی یەکگرتوو دێنێت.

 

 

ئەم شەڕە تەنیا لە بەرەکانی جەنگدا نییە، بەڵکو لە بازاڕەکانیشدا کاریگەریی هەیە. لە کاتێکدا ئەورووپا بۆ وزە پشتی بە گازی کەنداو بەستووە و نرخی نەوتیش بەرز دەبێتەوە، فریدمان دەڵێت بەرزبوونەوەی نرخەکان لەوانەیە زیان بە ئیدارەی ئێستای ئەمریکا بگەیەنێت. ئەم گوشارە ئابوورییە وادەکات "شەڕێکی خێرا" تەنیا ئامانج نەبێت، بەڵکو ببێتە پێویستییەکی سیاسی بۆ کۆشکی سپی.

 

 

لە کۆتاییدا، فریدمان هۆشدارییەک لەسەر دیموکراسی دەدات. فریدمان، دەڵێت نابێت شەڕێک بۆ "ئازادی" لە تاران، ببێتە هۆی ئەوەی ئاگامان لە لاوازبوونی دۆخی دیموکراسی لە وڵاتی خۆمان نەمێنێت. ئەو ئاماژە بەوە دەکات کە ترەمپ باسی یاسا و رێسا لە ئێران دەکات، لە کاتێکدا لە ئەمریکا رەخنەی لێ دەگیرێت. هەروەها هۆشداری دەدات کە نەتەنیاهوو لەوانەیە سەرکەوتن بەسەر ئێراندا بقۆزێتەوە بۆ ئەوەی دەسەڵاتی دادگای باڵای ئیسرائیل کەم بکاتەوە و کەرتی رۆژئاوا بخاتە سەر وڵاتەکەی.

 

فریدمان، دەگاتە ئەو ئەنجامەی کە ئەمە "هەستیارترین" کاتە لە ماوەی 40 ساڵی رابردوودا. هەموو شتێک و پێچەوانەکەشی، ئەگەری هەیە رووبدات.

 

 

سوپای پاسداران دەڵێت، بە مووشەکی هایپەرسۆنیک و درۆن هێرشیان کردووەتە سەر وەزارەتی بەرگریی ئیسرائیل و فڕۆکەخانەی بنگۆریۆن.

 

ئەم زانیارییە لەلایەن سوپای ئیسرائیلەوە تاوەکو ئێستا پشتڕاست نەکراوەتەوە.

 

 

بەرپرسێکی کۆمەڵەی زەحمەتکێشانی کوردستان بە رووداوی گوت، بنکەکانی حیزبەکە لە ناحیەی سوورداشی سەر بە قەزای دووکان بە مووشەک بۆردوومان کراون.

سوپای پاسدارانی ئێران شەپۆلی 18ـەیەمی هێرشەکانی راگەیاند. میدیای ئێران ئەم ڤیدیۆیەی بڵاوکردووەتەوە و دەڵێت، ساتی دەستپێکردنی شەپۆلەکەیە. 

 

 

ئاژانسی نێودەوڵەتیی وزەی ئەتۆم دەڵێت، لە دوایین هێرشەکانی ئەمریکا و ئیسرائیل ناسراو بە تووڕەیی داستانئاسا، بنکە ئەتۆمییەکانی ئێران هیچ زیانێکیان بەرنەکەوتووە. 

 

پێشتر ئەمریکا رایگەیاندبوو، بنکەی ئەتۆمیی نەتەنزیان پێکاوە.

 

باڵیۆزخانەی ئەمریکا لە عێراق داوا لە هاووڵاتییانی دەکات دەستبەجێ عێراق بەجێبهێڵن. داوایش دەکات تاوەکو لە عێراق دەربازیان دەکات خۆیان لە پەناگەکان بپارێزن.

 

بە درۆن هێرشکرایە سەر هەولێر و دوای بەرپەرچدانەوەی هێرشەکان، پاشماوەی درۆنێک بە خانووێکی گەڕەکی 32ـی پارک کەوت.

 

کەسێک بەهۆی پاشماوەی درۆنەکە بریندار بوو و گوێزرایەوە بۆ نەخۆشخانە.

 

بەگوێرەی زانیارییە سەرەتاییەکان و ئەو ڤیدیۆیانەی بۆ رووداو نێردراوە، لە گەڕەکی 32ـی پارک پاشماوەی هێرشەکە بەر خانووێک کەوتووە و زیانی پێگەیاندووە. 

 

ڤیدیۆکە لە سۆشیال میدیای رووداو ببینە.