پسوولەی خۆراک لە هەولێر: تۆمارکردنی فۆرمی ئەلیکترۆنی درێژکرایەوە

سیامەند قادر نانەکەلی، بەڕێوەبەری پسوولەی خۆراکی هەولێر بە تۆڕی میدیایی رووداوی گوت: "نیوەڕۆی ئەمڕۆ هەینی بە فەرمی لە بەغداوە ئاگادار کراینەوە، کە کاتی پڕکردنەوەی فۆڕمی ئەلیکترۆنی درێژکراوەتەوە بۆ یەکی ئابی 2025".

 

لە دووی حوزەیرانەوە پڕکردنەوەی فۆرمی ئەلیکترۆنیی خۆراک دەستیپێکردووە و بڕیاربوو دوایین رۆژ سبەی 05ـی تەمموز بێت.

 

تاوەکو کۆتایی مانگی رابردوو، لە ملیۆنێک و 984 هەزار خێزان لە پارێزگای هەولێر ملیۆنێک و 400 هەزار خێزان فۆرمی ئەلیکترۆنیان پڕکردبووەوە.

 

لە ملیۆنێک و 969 هەزار و 751 خێزان لە پارێزگای سلێمانی، زیاتر لە ملیۆنێک و 200 هەزار خێزان فۆڕمەکەیان پڕکردووەتەوە، لە هەڵەبجە لە 114 هەزار و 987 خێزان زیاتر لە 85 هەزار خێزان و لە دهۆک لە ملیۆنێک و 300 هەزار خێزان، زیاتر 750 هەزار خێزان فۆڕمیان پڕکردووەتەوە.

 

بۆ نوێکردنەوە و تۆمارکردنی هەموو خێزانەکان لە فۆرمی ئەلیکترۆنی، ئەپلیکەیشنێک ئامادە کراوە بە زمانەکانی کوردی و عەرەبی بەردەستە و زانیارییەکانی تێدا تۆمار دەکەیت.

 

لە رێگەی فۆرمی خۆراکەوە، مانگانە لە سنووری سلێمانی و هەڵەبجە دوو ملیۆن و 74 هەزار و 129 کەس؛ لە پارێزگای هەولێر ملیۆنێک و 984 هەزار کەس و لە پارێزگای دهۆکیش زیاتر لە ملیۆنێک و 320 هەزار کەس بەشەخۆراک وەردەگرن.

 

لێرەوە زانیاری زیاتر لەسەر فۆڕمی خۆراک؛ تۆمارکردنی خێزانە نوێیەکان و ئەوانەی فۆڕمی خۆراکیان ونکردووە وەربگرن.