.
رووداو دیجیتاڵ
حەوتەمین کاروانی کۆچبەران لە بێلاڕووسەوە گەڕانەوە هەولێر، کۆچبەرەکان بەشێکی زۆریان هاونیشتمانی هەرێمی کوردستانن و تەنیا ژمارەیەکی کەمیان خەڵکی ناوەڕاست و خوارووی عێراقن.
کۆچبەران برسێتی و سەرماو مامەڵەی ناتەندروستی پۆلیسی بێلاڕووس و پۆڵەندایان لەبیرنەکردووە، جگە لەوەی کە چەند هاونیشتمانییەک بە هۆی سەختی دۆخ و رێگەکە گیانیانلەدەستدا دوایینیان ژنێک بو کە دایکی 5 منداڵە.
بە کاروانی حەوتەمەوە دوو هەزار و 719 کۆچبەر لە سنووری بێلاڕووس - پۆڵەندا گەڕاونەتەوە هەرێمی کوردستان و عێراق.
دوایین کاروانی گەڕانەوەی کۆچبەران ژمارەیان 420 کۆچبەر بوو و بە فڕۆکەیەکی هێڵی ئاسمانیی عێراق، گەڕاونەتەوە فڕۆکەخانەی نێودەوڵەتیی هەولێر لە هەرێمی کوردستان.
کۆچبەرەکان بەردەوام باس لەوە دەکەن مامەڵەی پۆلیسی پۆڵەندا و بێلاڕووس مامەڵەیەکی دروستنەبووە، سەرباری خراپی گوزەرانی خۆیان، هەریەک چیرۆکێکی لەگەڵ خۆیدا هێناوەتەوە هەڵگرتووە، کە پێناچێ بەمزووانە لە یادەوەرییاندا لابچێت.
ژمارەی ئەو کۆچبەرانەی هێشتا لە سنووری بێلاڕووس - پۆڵەندا ماونەتەوە، وەک کۆچبەرەکان باسی دەکەن، نزیکەی دوو هەزار کۆچبەرە کە بەشێكیان خەڵکی باشووری کوردستانن، حکومەتیش دەڵێت؛ ئەم کاروانە بەردەوام دەبێت و پرۆسەی گەڕانەوەی کۆچبەرانیشمان خێراتر کردووە.
بە کاروانی حەوتەمەوە دوو هەزار و 719 کۆچبەر لە سنووری بێلاڕووس - پۆڵەندا گەڕاونەتەوە هەرێمی کوردستان و عێراق کە زۆربەیان خەڵکی باشووری کوردستانن، گەڕانەوەی حەوتەمین کاروانی کۆچبەران 401 کۆچبەر خەڵکی باشووری کوردستان و 19 کۆچبەریان خەڵکی ناوەڕاست و خوارووی عێراق بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ