رووداو دیجیتاڵ
وەزارەتی کارەبا دەڵێت، لیژنەی لێکۆڵینەوەیان سەردانی شوێنی ئاگرکەوتنەوەیان لە بازاڕی قەیسەریی هەولێر کردووە و دوای لێکۆڵینەوە سەرەتاییەکان بەڵگە و ئاماژەی وا لەبەردەستدا نەبوو کە هۆکاری ئاگرەکە کارەبا بووبێت.
لیژنەکەی وەزارەتی کارەبا بە سەرپەرشتیی حوسێن حەمەد قادر، راوێژکاری وەزارەت بووە. وەزارەتەکە دەڵێت، بەردەوام دەبن لە هاوئاهەنگی و هاوکاریی بەردەوامیان دەبێت لەگەڵ لیژنەکانی لێکۆڵینەوە و لایەنە پەیوەندیدارەکانی پارێزگای هەولێر.
شەوی رابردوو ئاگر لە بازاڕی قەیسەریی هەولێر کەوتەوە بە گوتەی قایمقامی هەولێر بۆ رووداو 228 دووکان سووتاون. هاوکات دوو لیژنە بۆ دیاریکردنی زیانە ماددییەکان و هۆکاری کەوتنەوەی ئاگرەکە پێکهێندراون.
ئێستا بازاڕەکە بە تەواوی داخراوە و هێزە ئەمنییەکانی لێ جێگیرکراون. قایمقامی هەولێر بە رووداوی گوت، "تاوەکو لیژنەکان بە وردی زیانەکان دیاری نەکەن، رێگە نادەین خەڵک بچێتە نێو بازاڕەکەوە."
چەند رۆژێک لەمەوبەر تیمەکانی شارەوانی داوایان لە کاسبکارانی بازاڕی قەیسەری کردبوو کە پەردە بەکارنەهێنن و لایببەن. قایمقامی هەولێر گوتی، "ئەو پەردانە ئەگەر هۆکاری ئاگریش نەبن، هۆکاری زوو تەشەنەکردنی ئاگرەکەن."
بازاڕی قەیسەری یەکێکە لە بازاڕە گەورەکانی شاری هەولێر و پێشتریش دووجار رووداوی ئاگرکەوتنەوە تێیدا روویداوە.
بازاڕی قەیسەری یەکێکە لە بازاڕە گەورەکانی شاری هەولێر و پێشتریش دووجار رووداوی ئاگرکەوتنەوە تێیدا روویداوە.
.jpg&w=3840&q=75)
