نەهێشتنی مادەهۆشبەرەکان: سێ کەس بە تۆمەتی بازرگانیکردن بە مادەی هۆشبەر دەستگیر کران

 

رۆژی پێنجشەممە، 7ـی ئەیلوولی 2023، بەڕێوەبەرایەتیی نەهێشتنی مادە هۆشبەرەکان رایگەیاند، لە هەوڵە بەردەوامەکانی بەڕێوەبەرایەتیی نەهێشتنی مادەھۆشبەرەکانی سەر بە بەڕێوەبەرایەتی گشتیی ئاسایش، "دوای کۆکردنەوەی زانیاری ورد و وەگرتنی فەرمانی بەرێز دادوەری لێکۆڵینەوەی ئاسایش، لەشاری هەولێر، لە بەرواری 7ی9ی2023 توانرا بڕی شەش کیلۆ و حەوت سەد گرام مادەی هۆشبەر لە جۆرەکانی کریستاڵ، حەشیش، ماریجوانا و تلیاک لەگەڵ هەزار شیت ترامادۆڵ و 10 شیت میتادۆن دەستی بەسەردا بگیڕێت." 

 

بەڕێوەبەرایەتییەکە دەشڵێت، بە هاوئاهەنگیی بەشی جموجۆڵی بەڕێوەبەرایەتیی ئاسایشی کەرکووک، سێ کەسیان بە تۆمەتی بازرگانیکردن بەو مادە هۆشبەرانەوە دەستبەسەر کردووە و "پەڕاوی لێکۆڵینەوە بۆ هەر سێ تۆمەتبار کراوەتەوە. بەپێی یاسای بەرەنگاربوونەوەی مادەهۆشبەرەکان و کارتێکەرە ئەقڵیەکان مامەڵەیان لەگەڵدا دەکرێت." 

هەر ئەمڕۆ پێنجشەممە، دەروازەی نێودەوڵەتیی حاجی ئۆمەران رایگەیاند، بە هاوئاهەنگیی بەڕێوەبەرایەتیی دەروازە سنوورییەکان، لە شاری هەولێر دەست بەسەر دوو کیلۆ و 200 گرام مادەی هۆشبەر لە جۆرەکانی کریستاڵ و مەریجوانادا گیراوە و "چەندین کەس" بە تۆمەتی بازرگانیکردن بە مادەی هۆشبەرەوە دەستگیر کراون.