دیمەنێک لە ئۆپەراسیۆنەکەی دژەتیرۆر
رووداو دیجیتاڵ
بەڕێوەبەرایەتیی گشتیی دژەتیرۆر لە سلێمانی، دەستگیرکردنی ژمارەیەک چەکداری داعشی لە سنووری شارەزوور راگەیاند.
رۆژی چوارشەممە، 8ـی کانوونی دووەمی 2025، بەڕێوەبەرایەتیی گشتیی دژەتیرۆر لە راگەیێندراوێکدا دەڵێ، "دوای چاودێری و بەدواداچوونێکی ورد، توانیمان ژمارەیەک تیرۆرستی داعش لە سنووری شارەزوور دەستگیر بکەین."
بە گوێرەی راگەیێندراوەکەی بەڕێوەبەرایەتیی گشتیی دژەتیرۆر: "تۆمەتبارە دەستگیرکراوەکان خەڵکی پارێزگای سەڵاحەدینن و لە کاتی دەسەڵاتی رێکخراوی تیرۆرستیی داعشدا لە چەندین پۆستی جیاوازدا کاریان کردووە، تۆمەتبارەکان لە چەندین کردەوەی تیرۆریستی و پێشێلکاری مافی مرۆڤدا دەستیان هەبووە."
"تۆمەتبارەکان رادەستی دادگەی تایبەتمەند کراون بۆ لێپێچینەوەی یاسایی." بەڕێوەبەرایەتیی گشتیی دژەتیرۆر وا دەڵێت.
دژە تیرۆر دڵنیایی دەدەن کە بەردەوام دەبن لە ئۆپەراسیۆنەکانیان "بە ئامانجی دەستگیرکردن و لەناوبردنی هەموو تیرۆرستان و شانە نووستووەکانی داعش لە سەرانسەری خاکی عێراق و هەرێمی کوردستان."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ