هەڵەیەک روویدا! دووبارە هەوڵبدە
کوردستان
دیمەنی شەقامێکی رۆژهەڵاتی کوردستان کە تێیدا دەردەکەوێت دووکانەکان داخراون لە چوارچێوەی مانگرتنی خەڵک
رووداو دیجیتاڵ
لە چەندین شاری رۆژهەڵاتی کوردستان ئەمڕۆ پێنجشەممە مانگرتنی گشتییە و زۆربەی دووکان و بازاڕەکان داخراون.
ئەو مانگرتنە وەکو "پشتیوانی لە ناڕەزایەتییە سەرانسەرییەکانی ئێران" و سەرکۆنەکردنی شێوازی رووبەڕووبوونەوەی ناڕەزایەتییەکانە لە کرماشان، ئیلام و لوڕستان لەلایەن هێزە ئەمنییەکانەوە.
بەپێی ئەو زانیارییانەی لە رۆژهەڵاتی کوردستانەوە بە تۆڕی میدیایی رووداو گەیشتوون، لە شارەکانی بۆکان، مهاباد، سنە، کامێران، روانسەر، دیواندەرە و مەریوان مانگرتنی گشتییە و زۆربەی دووکان و بازاڕەکان داخراون، بەراورد بە رۆژانی رابردووش ژمارەیەکی کەم هاونیشتمانی لەنێو شار و بازاڕ و شوێنە گشتییەکان دەبیندرێن.
رۆژی سێشەممە 06-01-2026 حەوت حیزبی رۆژهەڵاتی کوردستان بەناوی ناوەندی دیالۆگ راگەیەندراوێکی هاوبەشیان بڵاو کردەوە و داوای مانگرتنی گشتیان لە رۆژهەڵاتی کوردستان کرد.
لە راگەیێندراوی ئەو هێز و لایەنانەدا هاتبوو، ناڕەزایەتییەکان لە ئێران دەچنە هەفتەی دووەم و ئامانج لێیان "ستاندنی ماف و ئازادی، گەڕاندنەوەی کەرامەتی ئینسانی و کۆتاییهێنان بە سیاسەتی حاشاکردن، پەراوێزخستن، کوشتن، تیرۆر و هەڵاواردنە نەتەوەیی و فەرهەنگییەکانە."
لە راگەیێندراوەکەدا ئاماژە بەوە کراوە، "سەرکوتی خۆپیشاندانەکان و گرتنی خەڵکی ناڕازی و مافخوراوی ئێران" بە تووندی سەرکۆنە دەکەن و داوای مانگرتنی گشتی لە رۆژی 5 شەممە 18ی بەفرانباری 1404دا دەکەن، ئەوەش وەک هەوڵێک بۆ پشتیوان لە ناڕەزایەتییەکان و "هاوپێوەندی لەگەڵ هاونیشتمانییان لە کرماشان، ئیلام و لوڕستان."
لە ئێوارەی رۆژی یەکشەممە 28-12-2025ەوە مانگرتن و خۆپێشاندان لە تاران دەستیپێکرد.
ناڕەزایەتییەکان تائێستا 26 پارێزگای ئێران و رۆژهەڵاتی کوردستانییان گرتووەتەوە.
بەپێی زانیارییە نافەرمییەکان، نزیکەی 30 کەس کوژراون، بەڵام حکومەتی ئێران باس لە کوژرانی 10 کەس دەکات؛ بە سەدان کەسیش دەستگیرکراون.
بەگوێرەی ئامارە نافەرمییەکان، لە پارێزگاکانی کرماشان، ئیلام و لوڕستانی رۆژهەڵاتی کوردستان نزیکەی 12 هاونیشتمانی بە تەقەی هێزەکانی ئێران گیانیان لەدەستداوە و بە دەیان کەسیش دەستبەسەرکراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ