رووداو دیجیتاڵ
بەڕێوەبەرایەتی گشتیی کاروباری فڕۆکەخانەکان سەر بە وەزارەتی گواستنەوە و ژێرخانی تورکیا، ئاماری مانگی ئابی 2023ی سەرجەم فڕۆکەخانەکانی تورکیا و باکووری کوردستان بڵاوکردەوە و دەڵێت، 25 ملیۆن كهس لێیانەوە گەشتیان کردووە.
لە مانگی ئابدا فڕۆکەخانەکانی تورکیا و باکووری کوردستان خزمەتگوزاری پێشکێشی 24 ملیۆن و 689 ھەزار و 743 کەس کردووە؛ هەروەها 231 هەزار و 118 فڕۆکە گەشتیان لەو فڕۆکەخانانەوە کردووە و 441 هەزار و 907 تۆن باری کارگۆیشی هەبووە.
بەگوێرەی ئامارەکە، لە هەشت مانگی ئەمساڵدا 143 ملیۆن و 359 هەزار و 903 کەس لە رێگەی ملیۆنێک و 318 هەزار و 202 فڕۆکەوە گەشتیان کردووە؛ هەر لەو هەشت مانگەدا دوو ملیۆن و 645 هەزار و 87 تۆن کەلوپەل لەو فڕۆکەخانانەوە بە فڕۆکەی کارگۆ گوێزراونەتەوە.
جموجۆڵی فڕۆکەوانیی فڕۆکەخانەکانی تورکیا و باکووری کوردستان بەراورد بە مانگی ئابی ساڵی رابردوو بە رێژەی 12.8٪ و بەراورد بە هەشتی مانگی ساڵی رابردووش بە رێژەی 11.8٪ زیادیکردووە.
لە سەرانسەری تورکیادا 62 فڕۆکەخانەی سڤیل هەن، کە 17یان لە باکووری کوردستانن و فڕۆکەخانەکانی ئامەد، خارپێت، ئەرزەڕۆم، دیلۆک، قەرس، مەلەتێ، سێواس، رووها و وان نێودەوڵەتین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ