بەلەمێک بە 90 کۆچبەرەوە لە سنووری ئاوی یۆناندا ئاستەنگی بۆ دروستبووە و زۆربەی سەرنشینەکانی کوردن

رۆژی شەممە 10ـی حوزەیرانی 2023، پێشڕەو عەبدوڵڵا، نوێنەری کۆمەڵەی پەنابەرەگەڕاوەکان لە ئەوروپا بە تۆڕی میدیایی رووداوی گوت، "بەلەمێکی کۆچبەران سێ رۆژە لە تورکیاوە بۆ وڵاتانی ئەوروپا بەڕێکەوتووە و لە نزیک دوورگەی کریتی یۆنان ئاستەنگی بۆ دروستبووە و بەهۆیەوە ژیانی 90 کۆچبەر لە مەترسیدایە کە زۆرینەیان کوردن." 

بە گوتەی پێشڕەو عەبدوڵڵا کە ئێستا لە یۆنانە، سەرنشینانی بەلەمەکە زۆرینەیان هاونیشتمانی پارێزگاکانی سلێمانی و هەڵەبجە، هەروەها رۆژئاوا و رۆژهەڵاتی کوردستانن و ژن و منداڵیان تێدایە.

پێشڕەو عەبدوڵڵا ئاماژەی بەوەکرد کە "بەرەبەیانیی ئەمڕۆ پۆلیسی کەناراوەکانی یۆنانمان لە رووداوەکە ئاگادار کردەوە؛ تاوەکو ئەوان گەیشتبوون بەلەمەکە کەمێک کاری کردبوو و شوێنەکەی گۆڕیبوو. ئێستا لەکار کەوتووەتەوە و ئێمەش لەسەر هێڵین بۆ ئەوەی پۆلیسی کەناراوەکانی یۆنان بەهانایانەوە بچن." 

بەگوێرەی دیمەنێکی کۆچبەرەکان لە نێو بەلەمەکەدا کە کۆمەڵەی پەنابەرە گەڕاوەکان بۆ رووداویان ناردووە، یەکێک لە کۆچبەران دەڵێت، "ئەو کابرا [خاوەن بەلەمەکە] بۆلای باخیرەیەک دەڕوا؛ هەر مل دەنێت و نازانین بۆ کوێ دەڕوا؛ گیرمان خواردووە." 

بەگوێرەی دەزگای لووتکە، لە ساڵی 2022دا 71 هەزار و 225 عێراقی داوای مافی پەنابەرێتییان لە وڵاتانی ئەوروپا و ئەمریکا کردووە، 71 کەسیش لەو رێگەیەدا گیانیان لەدەستداوە، حەوتیش بێسەروشوێن بوون.

هەروەها بەگوێرەی ئاماری ئاژانسی سنوورەکانی ئەوروپا و پاسەوانی کەناراوەکان کە بە فرۆنتێکس ناسراوە، 170 هەزار پەناخواز بە تێکڕا لە 2022دا بە سێ رێگەی جیاوازدا گەیشتوونەتە ئەوروپا. ئەو ژمارەیە بەراورد بە 2021، 30% زیادیکردووە.