قه‌ده‌خەی خۆپێشاندان و چالاکی له‌ 12 پارێزگای باکووری کوردستان درێژکرایەوە

رووداو دیجیتاڵ

وەکو هەنگاوێک لە بەرامبەر کاردانەوەکانی تایبەت بە بڕیاری دانانی قەییوم بۆ شارەوانیی جۆلەمێرگ، قەدەخەی هەموو جۆرە چالاکییەکی وەکو خۆپیشاندان، رێپێوان، لێدوانی رۆژنامەڤانی، گردبوونه‌وه‌ و خێوه‌ت هه‌ڵدان لە 12 پارێزگای باکووری کوردستان بۆ پێنج رۆژی دیکە درێژکرایەوە.

شەوی رابردوو پارێزگاکانی جۆلەمێرگ، ئامەد، وان، بەدلیس، سێرت، شرنەخ، ئیدر، دێرسم، مووش، ئاگری، ئێلیهـ و مێردین راگەیێندراوی هاوکاتیان بڵاوکردەوە و تێیاندا قەدەخەی هەموو جۆرە چالاکییەکی وەکو خۆپێشاندان، رێپێوان، لێدوانی رۆژنامەڤانی، گردبوونه‌وه‌ و خێوه‌ت هه‌ڵدانیان بۆ ماوەی پێنج رۆژی دیکە درێژکردەوە.

لە راگەیێندراوەکاندا هاتووە، "لەپێناو یەکڕیزیی گەل، یەکپارچەیی وڵات، پاراستنی ئاسایشی نیشتمانی، رێگریکردن لە تاوان، پاراستنی تەندروستیی گشتی و رێگریکردن لە تووندوتیژی، بە پشتبەستن بە بڕگەکانی ‌ئەلیف و جیم لە 11یەمین مادەی یاسای ژمارە 5442ی بەڕێوەبردنی شارەکان و 17یەمین مادەی یاسای ژمارە 2911ی چالاکییەکان، کۆمەڵێک رێوشوێن گیراونەتەبەر."

لە راگەیێندراوەکەی هەر 12 پارێزگاکەی باکووری کوردستاندا باس لەوە کراوە، لە کاژێر 00:00ی رۆژی 6ی حوزەیران تاوەکو کاژێر 23:59ی رۆژی 14ی حوزەیرانی 2024 و بۆ ماوەی پێنج رۆژ بەدەر لەو چالاکییانەی لەلایەن پارێزگا و قایمقامیەتەکانەوە مۆڵەتیان پێدەدرێت، هەموو جۆرە گردبوونەوە و چالاکییەک قەدەخە کراوە.

بڕیاری قەدەخەکردنەکان دوای ئەوە هات رۆژی 3ی حوزەیران بە بڕیاری وەزارەتی ناوخۆی تورکیا محەممەد سدیق ئاکش، سەرۆکی شارەوانیی جۆلەمێرگ لەسەر کار لادرا و عەلی چەلیک، پارێزگاری جۆلەمێرگ بە قەییوم لە شوێنی دانرا.

بڕیارەکە کاردانەوەی بەدواداهات و دەم پارتی بڕیاری دا لە سەرجەم شارەوانییەکان چالاکی دەستپێبکات و داوای کرد گردبوونەوە و چالاکی ناڕەزایی بکرێت.