ئایا هەولێر، دهۆک و کەرکووک کەوتوونەتە سەر هێڵی بوومەلەرزە؟

محەممەد کەمال، شارەزای کەشوهەوا و بوومەلەرزەزانی، ئەمڕۆ بە تۆڕی میدیایی رووداوی گوت، "بەگوێرەی گۆڕانکارییەکان، ئاراستەی هێڵی بوومەلەرزەی ئێستا شارەکانی هەولێر، کەرکووک، دهۆک، دەربەندیخان، موسڵ، کەلار و کفریی دەگرێتەوە و کەوتوونەتە سەر هێڵی بوومەلەرزە".

لەو بارەیەوە، فازڵ ئیبراهیم، بەڕێوەبەری گشتیی کەشناسی و بوومەلەرزەزانی هەرێمی کوردستان، ئەمڕۆ چوارشەممە بە تۆڕی میدیایی رووداوی گوت، "زۆربەی بوومەلەرزەکان لە ناوچەی بەریەککەوتنی دوو پلێتی ژێر زەوی روودەدەن، کە ئەویش لە ئەنجامی پاڵەپەستۆ و گوشاری نێوان پلێتەکانەوەیە، بەڵام هەموو چالاکییەکی بوومەلەرزەش ناکەونە سنووری بەریەککەوتنی نێوان پلێتەکان کە ئەویش بەهۆی لێکترازان و لاوازی توێکڵی زەوییەوەیە لە ناوچەکانی دوور لە پلێتەکە".

لەبارەی جووگرافیای هەولێر و پلێتەکانی ژێرییەوە، بەڕێوەبەری گشتیی کەشناسی و بوومەلەرزەزانی هەرێمی کوردستان گوتی، "لە تۆماری بوومەلەرزەدا لە ساڵی 2005ـەوە تاوەکو ئێستا هیچ بوومەلەرزەیەکی بەرچاو لە هەولێر و دەوروبەری تۆمار نەکراوە، کە ئاماژە بێت بۆ چالاکی ئەو هێڵەی کە بە نزیک هەولێردا تێپەڕ دەبێت، بەڵام لە کۆکراوە و تۆماری گشت بوومەلەرزەکانی ناوچەکەدا لە 118 ساڵی رابردوو لە ناوچەکەمان روویداوە، ئەوا چڕی رووداوەکانی بوومەلەرزە دەکەوێتە ناوچەی چیاکانی زاگرۆس بە درێژایی 1500 کیلۆمەتر لە باکوورەوە و بۆ باشوور".

محەممەد کەمال لەم بارەیەوە دەڵێت، "راستە ئێستاش بەتاڵبوونەوەی بوومەلەرزە لە ناوچە شاخاوییەکان سەرەکییە لە هێڵی زاگرۆس، بەڵام وەکو جووڵانی پلێتەکان و گۆڕانی رێڕەوی بوومەلەرزەکان کەوتوونەتە نێو سەنتەری شارەکانەوە".

بەڕێوەبەری گشتیی کەشناسی و بوومەلەرزەزانی هەرێمی کوردستان رایدەگەیێنێت، لەنێو چەندین هەڵسەنگاندن دا بۆ دیارکردنی شوێنێک وەکو ئەوەی لەسەر هێڵی بوومەلەرزە بێت، پێشنیازی جیاواز هەن، یەکێک لەوانە پشتی بەستووە بە چالاکی بەرزی بوومەلەرزە [کە لە سنووری هەولێر کەمە].

بەگوتەی فازڵ ئیبراهیم، نەبوونی چالاکی بەرزی بوومەلەرزە لە دەیان ساڵی رابردوودا لە هەولێر، پاڵپشتی کەوتنە سەر هێڵی بوومەلەرزەی شارەکە ناکات.