رووداو دیجیتاڵ
کچێک لە سنووری تەقتەق لە قەزای کۆیە لە ئاودا خنکا. بەرگریی شارستانی دەڵێت، هۆکارەکەی نازانن.
رووداوەکە پاشنیوەڕۆی ئەمڕۆ سێشەممە لە زێی بچووک روویداوە. عەمید گۆران ئەحمەد، بەڕێوەبەری بەرگریی شارستانیی کۆیە بە تۆڕی میدیایی رووداوی گوت، "کچەکە ناوی لاڤە سەدرەدین عیزەتە و لەدایکبووی ساڵی 2008ـە."
گۆران ئەحمەد گوتیشی، ماڵی کچەکە نزیکی زێیەکەیە لە تەقتەق. ئاماژەی بەوەش کرد، "پەڕاوی لێکۆڵینەوە بۆ رووداوەکە کراوەتەوە و تاوەکو ئێستا هۆکارەکەی نازانین."
بەگوێرەی ئاماری لایەنە پەیوەندیدارەکان بۆ رووداو، لە سەرەتای ئەم ساڵەوە تاوەکو 26ی تشرینی یەکەم 49 کەس لە هەرێمی کوردستان لە رووبار و چەمەکاندا خنکاون.
بەگوێرەی ئامارەکە، لە سنووری هەولێر 28 کەس، لە سنووری دهۆک 12 کەس، لە سنووری سلێمانی 8 کەس و لە هەولێریش یەک کەس لە ئاودا خنکاون.