مەحموود هاودیانی، ئەندامی مەکتەبی سیاسیی یەکگرتووی ئیسلامی.
رووداو دیجیتاڵ
ئەندامێکی مەکتەبی سیاسی یەکگرتووی ئیسلامی کوردستان رەتیدەکاتەوە بۆ هەڵبژاردن رێککەوتنیان لەگەڵ جوڵانەوەی نەوەی نوێ کردبێت و دەڵێت، تەنیا کادیرێکمان لە لیستەکەیان بەربژێرە و ئازادیشە دوای دەرچوونی لە فراکسیۆنی نەوەی نوێ بمێنێتەوە.
رۆژی 13ی تشرینی یەکەمی 2025، د.محەممەد هاودیانی ئەندامی مەکتەبی سیاسی یەکگرتووی ئیسلامیی کوردستان لەکاتی بەشداریکردنی لە بووڵتەنی کاژێر 12ی تۆڕی میدیایی رووداو کە سەنگەر عەبدولڕەحمان پێشکێشی دەکرد، رایگەیاند." لە کەرکووک بەربژێرمان نییە، تەنیا کادیرێکمان لەسەر لیستی جوڵانەوەی نەوەی نوێ خۆی بەربژێر کردووە، هیچ ئاراستەیەکی سیاسیشیان نییە دەنگی پێبدەن و کادیرانی یەکگرتوو ئازادن لەوەی دەنگی بدەنێ یان نا."
بە گوتەی ئەندامەکەی مەکتەبی سیاسی یەکگرتووی ئیسلامیی کوردستان، هیچ رێککەوتنێکیان لەگەڵ جووڵانەوەی نەوەی نوێ نییە، ئەو کەسەی لە کەرکووک خۆی هەڵبژاردووە تەنیا کادیری یەکگرتووە، بەربژێری حیزبەکە نییە، ئەو ئازادە دواتر لە فراکسیۆنی نەوەی نوێ دەمێنێتەوە یاخود پەیوەندی بە فراکسیۆنی یەکگرتوو دەکاتەوە.
د.محەممەد هاودیانی لەبارەی رێگەدان بە کادیرانیان بۆ خۆبەربژێرکردن لە لیستی لایەنەکانی دیکە باسی لەوەکرد، کەرکووک جیاوازە ئەگەرنا لە هەرێمی کوردستان رێگە بە هیچ ئەندامێکی خۆیان نادەن خۆی لە لیستی دیکەدا خۆی بەربژێر بکات.
ئەندامەکەی مەکتەبی سیاسی یەکگرتوو سەبارەت بە بەربژێرکردنی ئەندامانیان لەناو لیستی پارتی دیموکراتی کوردستان و یەکێتیی نیشتمانیی کوردستان رونیکردەوە، "نەوەی نوێ و ئەو دوو پارتە جیاوازن، ئەو کادیرەشیان لە یەکگرتوو خۆی حەزی کردووە لە نەوەی نوێ خۆی بەربژێر بکات. "
یەکگرتووی ئیسلامی لە دوایین هەڵبژاردنی پەرلەمانی عێراق چوار کورسی بەدەستهێنا، لە هەڵبژاردنی پەرلەمانی کوردستانیش کە ساڵی رابردوو بەڕێوەچوو حەوت کورسی هێنا و خۆی وەک ئۆپۆزیسیۆن ناساندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ