رووداو دیجیتاڵ
ئەنجوومەنی وەزیران کۆدەبێتەوە و بڕیارە تاوتوێی هۆکاری ئاگرکەوتنەوەکەی سۆران و بارودۆخی کارەبا بکات.
رۆژی چوارشەممە 13-12-2023، ئەنجوومەنی وەزیرانی هەرێمی کوردستان بە سەرپەرشتیی مەسرور بارزانی، سەرۆکوەزیران و بە ئامادەبوونی قوباد تاڵەبانی، جێگری سەرۆکوەزیران کۆدەبێتەوە.
بڕیارە لە کۆبوونەوەی ئەمڕۆ یەکێک لە بڕگەکان تایبەت بێت بە هەڵسەنگاندنی رێكارەكانی فریاگوزاریی شارستانی و لێكۆڵینەوە لە هۆكارەكانی رووداوی ئاگرکەوتنەوە لە باڵەخانەكەی ئیدارەی سەربەخۆی سۆران كە لە 8ـی ئەم مانگەدا روویدا و بووە هۆی گیانلەدەستدانی 14 کەس و برینداربوونی چەند کەسێکی دیکە.
ئەو ئاگرە، شەوی 08-12-2023 کاژێر 08:15 لە باڵەخانەیەک لەسەر رێگەی سەرەکی سۆران - چۆمان لە گەڕەکی جووندیانی سۆران کەوتەوە و حکومەتی هەرێمی کوردستانیش لیژنەیەکی بۆ زانینی هۆکاری ئاگرکەوتنەوەکە پێکهێنا.
ئەمڕۆ چوارشەممە، رەجەب زوبێر، قایمقامی قەزای سۆران بە رووداوی گوت، "لیژنەکە ئەمڕۆ کارەکانی تەواوکردووە و راگەیاندنی راپۆرتەکە لای وەزارەتی ناوخۆییە و ئەوەی روونبووەتەوە هۆکاری ئاگرەکە شۆرتی کارەبا بووە."
لە بڕگەیەكی دیکەی کۆبوونەوەکە، بڕیاری كۆتایی لەسەر راپۆرتی جێگری سەرۆکوەزیران، تایبەت بە پرسی زیادبوونی ژمارەی تووندوتیژی دژی ئافرەتان و خستنەڕووی راسپاردە و چارەسەرەکان دەدرێت، کە لە کۆبوونەوەی پێشووی ئەنجوومەنی وەزیراندا خرابووەڕوو و بڕیاردان لەسەر راپۆرتەکە بۆ کۆبوونەوەی ئەم هەفتەیە دواخرابوو.
لە دوایین بڕگەی کۆبوونەوەی ئەنجوومەنی وەزیران، تاوتوێی راپۆرتێکی وەزیری كارەبای هەرێمی کوردستان دەکرێت لەبارەی رەوشی كارەبا و گرفتی کوژانەوەی گشتیی سیستمی کارەبا و هەوڵی وەزارەت بۆ زیادکردنی بەرهەمهێنان و گەڕانەوەی كارەبا. هەر پەیوەست بەو پرسە بەرنامەی پریپەید و نرخەكەی تاوتوێ دەكرێت.
گفتوگۆکردن لەبارەی دۆخی کارەبای هەرێمی کوردستان لە کاتێکدایە، رۆژی پێنجشەممە 30-11-2023، تۆڕی گشتیی کارەبای نیشتمانیی هەرێمی کوردستان کوژایەوە و وەزارەتی کارەبا لە روونکردنەوەیەکدا گوتی، بەهۆی گرفتێكی تەكنیكییەوە، تەواوی یەكەكانی بەرهەمهێنانی كارەبای هەرێمی کوردستان كوژانەوە و تیمەکانی وەزارەتی كارەبا پاش چەند کاژێرێک کێشەکەیان چارەسەر كرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ