رووداو-هەولێر
پێش نیوەڕۆی ئەمڕۆ شەممە لە رێوڕەسمێکدا بە ئامادەبوونی بەشێک لە ئەندامانی مەکتەبی سیاسی و سەرکردایەتی یەکێتی ، شاڵاو کۆسرەت رەسول ، وەک بەرپرسی مەڵبەندی سێی یەکێتی لە هەولێر ناسێندرا.
رزگار عەلی بەرپرسی پێشووی مەڵبەندی هەولێری یەکێتی رایگەیاند: "سەرکەوتنی یەکێتی لە هەولێر بەمانای سەرکەوتنە لە هەموو کوردستان و هیوای سەرکەوتن بۆ کاک شاڵاو دەخوازم لەو ئەرکە نوێیەیدا".
هەروەها رەفعەت عەبدوڵڵا ، ئەندامی مەکتەبی سیاسی یەکێتی رایگەیاند: "شالاو کۆسرەت رەسول رۆڵێکی زۆر باشی گێڕا لە چارەسەرکردنی دۆخی ناوخۆیی یەکێتی و دڵنیام لە کارەکەیدا سەرکەوتوو دەبێت".
هەروەها سەعدی ئەحمەد پیرە ، گوتەبێژی یەکێتی رایگەیاند: "وەرگرتنی پۆستی بەرپرسی مەڵبەند کارێکی ئاسان نییە و دڵنیام بەو کەسایەتییەی لە کاک شاڵاو بینیومە و دەیناسم ، هەوڵدەدات بۆ ئەوەی لەو ئەرکەی سەرکەوتوو بێت".
لە گوتارێکدا شاڵاو کۆسرەت رەسول ، بەرپرسی مەڵبەندی سێی یەکێتی لە هەولێر گوتی: "دەمانەوێت کارێک بکەین یەکێتی لە پایتەختی کوردستانەوە دیسان بەرەو پێش و بەرەو ئەو ئاستەبەرزە بڕوات کە رووبارێک خوێنی بۆ دراوە".
شاڵاو کۆسرەت رەسول گوتی: "ئەگەر هەموومان پێکەوە کار بکەین ، هیچ گومانم لەوەدا نییە کە یەکێتی لە گۆڕەپانی سیاسی نەک تەنیا کوردستان بەڵکو لە عێراقیش دەتوانێ دەنگی خۆی هەبێت و سەنگی مەحەک بێت لە بڕیاردان".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ