رووداو دیجیتاڵ
نزیکەی 26 هەزار ئاوارەی دهۆک دەتوانن بۆ هەڵبژاردنی پەرلەمانی عێراق دەنگ بدەن، زۆربەیان ئاوارەی شنگالن، دەنگدەرانی ئەو قەزایە لەناو و دەرەوەی کەمپەکان بەربژێرانی خۆیان لە دهۆک دیاری دەکەن و دەنگەکانیان دەگەڕێتەوە بۆ بازنەی نەینەوا.
بەگوێرەی ئامارەکانی کۆمیسیۆنی باڵای سەربەخۆی هەڵبژاردنەکانی عێراق لە کۆی 26 هەزار و 500 ئاوارە لە هەرێمی کوردستان دەتوانن دەنگ بدەن، لەو ژمارەیە 25 هەزار و 986 ئاوارە لە پارێزگای دهۆکن.
خالید عەباس، بەڕێوەبەری نووسینگەی دهۆکی کۆمیسیۆنی باڵای سەربەخۆی هەڵبژاردنەکانی عێراق رۆژی سێشەممە بە تۆڕی میدیایی رووداوی راگەیاند: "دەنگدانەکە ئەو ئاوارانەش دەگرێتەوە لە دەرەوەی کەمپەکانن بەو مەرجەی خەڵکی شنگال بن و لە کۆمیسیۆن تۆمار کرابن."
بەگوتەی ئەو بەرپرسەی کۆمیسیۆن 90%ـی دەنگدەرانی ئاوارەی شنگال لەنێو کەمپەکانن، 95%ـی تەواوی ئاوارەی نێو کەمپەکانی دهۆکیش خەڵکی ئەو قەزایەن.
کوردی ئێزدی لە نەینەوا کورسییەکی کۆتای هەیە، شەش بەربژێر رکابەریی لەسەر دەکەن، ئەوە جگە لە لیستێکی تایبەت بە کوردانی ئێزدی و بەربژێری دیکەی کوردی ئێزدی لە نێو لیستە رکابەرەکانی نەینەوا.
بەڕێوەبەری گشتیی نووسینگەی دهۆکی کۆمیسیۆنی باڵای سەربەخۆی هەڵبژاردنەکانی عێراق دەڵێ: "هیچ رێگرییەکی یاسایی نییە لەوەی بەربژێرانی شنگال سەردانی کەمپی ئاوارەکان لە دهۆک بکەن بەمەبەستی بانگەشەی هەڵبژاردن."
پشکی نەینەوا 34 کورسییە لە پەرلەمانی عێراق، سێ لە کورسییەکانی نەینەوا کۆتای کریستیان و کوردانی شەبەک و ئێزدین.
حەسەن سەلمان، راوێژکاری یاسایی لە کۆمسیۆنی باڵای سەربەخۆی هەڵبژاردنەکانی عێراق بە تۆڕی میدیایی رووداوی راگەیاند: "دەنگی ئاوارەکان لە هەڵبژاردنی پەرلەمانی عێراق، دەگەڕێتەوە بۆ پارێزگای نەینەوا و لەسەر ئەنجامی دەنگەکانی ئەو پارێزگایە هەژمار دەکرێت."
نزیکەی 8 هەزار بەربژێر رکابەری دەکەن بۆ 329 کورسیی پەرلەمانی عێراق لەو هەڵبژاردنەی بڕیارە لە 11ی تشرینی دووەمی 2025 بەڕێوەبچێت.
.jpg&w=3840&q=75)
