کۆمیسیۆن لە دهۆک: نۆ حیزب بۆ بەشداری لە هەڵبژاردن ناویان تۆمار کردووە

 

 

رۆژی هەینی 15-03-2024 خالید عەباس، بەرپرسی نووسینگەی دهۆکی کۆمیسیۆنی باڵای سەربەخۆی هەڵبژاردنەکانی عێراق لەکاتی بەشداریکردنی لە بووڵتەنی کاژێر 11:00ی تۆڕی میدیایی رووداو، کە سیما ئابخزر پێشکێشی کرد، رایگەیاند، "تاوەکو ئێستا نۆ لایەنی سیاسی بۆ هەڵبژاردنی خولی شەشەمی پەرلەمانی کوردستان ناویان لە نووسینگەی دهۆکی کۆمیسیۆن تۆمار کردووە."

 

ئەو لایەنە سیاسییانەی ناویان تۆمار کردووە بریتین لە بەرەی گەل، پارتی سۆسیال دیموکراتی کوردستان، حیزبی زەحمەتکێشانی کوردستان، هاوپەیمانیی نیشتمانی، حیزبی رەنجدەرانی کوردستان، نەوەی نوێ، یەکگرتووی ئیسلامی، پارتی دیموکراتی کوردستان و کۆمەڵی دادگەریی کوردستان.

 

وەکو بەرپرسی نووسینگەی دهۆکی کۆمیسیۆن ئاماژەی پێدا، یەکەم لایەنی سیاسی کە ناوی بۆ بەشداریکردن لە هەڵبژاردن تۆمار کردووە، "هاوپەیمانیی نیشتمانی" بووە و دوایین لایەنی سیاسییش "پارتی رەنجدەرانی کوردستان" و "بەرەی گەل" بوون.

 

بە گوتەی خالید عەباس، 17 بەربژێری تاکیش لە سنووری دهۆک ناویان تۆمار کردووە، کە دوو لەوان ئافرەتن، گوتیشی، "بەربژێرانی سەربەخۆ ناتوانن بە لیست بەشداریی هەڵبژاردن بکەن."

 

بەرپرسی نووسینگەی دهۆکی کۆمیسیۆن ئەوەشی خستەڕوو، تاوەکو ئێستا زیاتر لە 130 هەزار کارتی بایۆمەتری بەسەر دەنگدەراندا دابەشکراون و رۆژانە نزیکەی 3000 کارت دەدرێنەوە بە دەنگدەران. گوتیشی، "تەنیا کارتی ئەوانەی مانگی شوبات ناویان تۆمارکردووە، نەگەڕاونەتەوە، کە بڕیارە مانگی چوار کارتەکانیان بگاتەوە هەرێـمی کوردستان."

 

رۆژی پێنجشەممە 14-03-2024 دوایین رۆژی تۆمارکردنی هاوپەیمانی و قەوارە و بەربژێری تاک بوو، تەنیا دوو هاوپەیمانی تۆمار کران، ئەوانیش، (هاوپەیمانیی سەردەم) بوو لەنێوان پارتی رەنجدەرانی کوردستان، پارتی پارێزگارانی کوردستان و یەکێتیی نەتەوەیی دیموکراتی کوردستان. هەروەها (هاوپەیمانیی هەرێمی کوردستان) لەنێوان پارتی سۆسیال دیموکراتی کوردستان، حیزبی زەحمەتکێشانی کوردستان و حیزبی شیوعیی کوردستان.

 

رۆژی 3ی ئاداری 2024، نێچیرڤان بارزانی، سەرۆکی هەرێمی کوردستان بە فەرمانێکی هەرێمی، رۆژی 10ی حوزەیرانی ئەم ساڵی بۆ بەڕێوەچوونی هەڵبژاردنی پەرلەمانی کوردستان دیاریکرد.