رووداو دیجیتاڵ
لەگەڵ نزیکبوونەوەی جەژنی قوربان، سەردانی خانمان بۆ ئارایشتگەکان زیادی کردووە و نۆرەیان گرتووە. خاوەن ئارایشتگەیەک لە هەولێر دەڵێت زۆرترین داوکاری لەسەر قژبڕین، دانانی برژانگ و نینۆک، هەروەها پاککردنەوەی پێیە.
گەلاوێژ سەعید، خاوەن ئارایشتگەیەکی هەولێرە و بە رووداوی گوت، لەگەڵ نزیکبوونەوەی جەژنی قوربان، کارکردن لە ئارایشتگەکەیان کردووەتە دوو شیفت، بەهۆی زۆریی سەردانی خانمان.
گوتیشی، رۆژانە 100 خانم بەمەبەستی بڕین و خاوەکردنەوە و رەنگکردنی قژ، دانانی برژانگ و نینۆک و پێ پاککردنەوە سەردانیان دەکەن. "بەگشتی ئەمساڵ زۆرترین داوکاریی خانمان لەسەر دانانی برژانگ و نینۆک بووە."
خاوەن ئەو ئارایشتگەیەی هەولێر، نەیشاردەوە ماوەی دوو هەفتەیە سەردانی خانمان بۆ ئارایشتگەکان زیادیکردووە، بۆیە کارمەندی زیاتریان بۆ ئەو ماوەیە وەرگرتووە.