لای ئیسلامییەكان، یان تۆ دەبێـت لەگەڵ ئەوان بیت، یان ئەوەتا تۆ دووژمنیت و لە سەنگەری بەرامبەریت. ئەم سەنگەری بەرامبەرەش پلەدارە، لە موسڵمانێكی بێپەل و پۆی بێدەخلەوە دەستپێدەكات، تاوەكو دەگاتە ئەو موسڵمانانەی لە ناو حیزبە عەلمانییەكانن. واتە تۆ ئەگەر موسڵمانێكی بێ دەخلیت، تەنیا خەریكی عیبادەتی خۆتی و هەقت بەسەر كەسەوە نییە، ئەوا، بەڕای ئیسلامییەكان، تۆ موسڵمانێكی لاپڕەسەن و كەمتەرخەم و گۆشەگیر و ناتەواویت. ئەگەر لەنێو حیزبە عەلمانییەكانیش بیت (وەك پارتی و یەكێتی) ئەوا لە دین دەرچوویت .
ئینجا ئەم پۆلێنكردن و جیاوازی خستنەوە، هەر لێرەوە ناوەستێت، بەڵكو پەلدەكێشێتە نێو خودی ئیسلامییەكان. هەر لەبەرئەوەشە بەردەوام پەرتەوازە دەبن و لە یەكتر جیادەبنەوە . بزووتنەوەی ئیسلامیی كۆن، خەڵكانی ئیخوانولمسلمینی (كە دواتر وەك یەكگرتوو خۆیان بەیانكرد) بە گومڕا و لە رێ لادەر دەناساند. یەكگرتوو، بزووتنەوەی پێ كۆمەڵێك خەڵكی سەر لێشێواوبوو (پێیاندەگوتن حەرەكە كەرەكە!). بزووتنەوەش ناو و ناتۆری زۆری هەبوو بۆ ئیخوانەكان (واتە یەكگرتوو لە ساڵی 1994ەوە)، كە پڕە لە تەشهیر و جنێو. لەنێو ئیخوانەكانیش چەند بەشبوون. نەهزە بەخەتی دوو ناسرابوو. واتە یەكگرتوو خەتی یەك بوو (یەعنی خەت خەتانێ!). بزووتنەوەش بۆ خۆی سەیر و سەمەرەبوو لە خەت خەتانێ. خەتی مامۆستا عەلی باپیر جیابوو. خەتی مەلا كرێكار. خەتی مەلاكانیش! خەتی سەلەفییەكانیش لەولا. هەموویان لە گەڵ یەكتری ناكۆك و ناحەز و دژ بە یەكتری، هەتا بوونە چەندین گرووپ و حیزبی جیا. لە هەولێریش، وێڕای خەتێكی تایبەتی سەر بە هەندێك كەسایەتی، جەماعەتێكیش بە ناوی جیهادەوە دامەزرا بە رێبەرایەتی مەلا ئەمین، كە سەرجەم ئەوانیتری بە گومڕا و لە رێ لادەر دەبینی.
سەلەفییەكانیش چەند گرووپێك بوون. لە هەولێر و سلێمانی و دهۆك كەسە ناسراوەكانی محەممەد ئیحسان و عومەر سەلەفی بوون، كە بزووتنەوە و مەلاكان و ئیخوانەكانیان پێ گومڕا و سەر لێشێواو بوو. ئیسلامییەكان، كەسایەتی جیا و پەیڕەو و پرۆگرام و جەماعەتی جیا جیای پەرتەوازە و ناكۆك بوون. كەس بە كەس رازی نەبوو، هەركەسەو خۆی پێ راستبوو و ئەوانیتر لە رێ لادەر. واتە ئیسلامییەكان چەندین گرووپ و تەوژم و حیزبی جیابوون و پەرتەوازە و ناحەز و ناكۆك، تەنانەت تەكفیری یەكتریان دەكرد. سەربردەی زۆر هەیە هەر لەساڵی 1991 وە، تاوەكو رۆژگاری ئەمڕۆمان. ئەمەش شتێكی سەیر نییە، چونكە لە هەموو شوێنەكانی دونیا ئەمە دیدەنیانە! ئەو شتانەی باسمكردن دەگەڕێنەوە بۆ سەرەتای نەوەتەكان . ئێستا قوڕەكەیان خەست و چڕترە، بوونەتە گاڵتەجاڕی دونیا!
یەكێك لەو شتانەی رەفتارێكی هاوبەشبوو لەنێوان ئەم گرووپ و حیزب و تەوژمە ئیسلامیانە، دووژمنایەتییكردنی مەلاكان و سووكایەتی پێكردنیان بوو. لای ئیسلامییەكان بەگشتی، مەلا، بە شتێكی قێزەون و ناشیرین و دواكەوتوو و ناموسڵمان تەماشا دەكرا. تەنیا ئەو مەلایانەیان لەلا باشبوون كە هەوادار و مەیلداری ئەوان بوون، وەك مەلا بەشیر و مەلا عەبدولغەنی و ...هتد، كە دواتر ئەوانیش ئیتر بێزران و بە لەعنەت كران، چونكە لە بازنەی ئیسلامییەكان هاتنە دەرەوە. بەهەر حاڵ، مەلاكان بەگشتی لەوە تێگەیشتبوون، كە ئیسلامییەكان بە چاوی سووك و ناحەز تەماشایان دەكەن و نیشانەی زەڕبیان لەسەر دراوە! لەلایەكی دیكەوە سەد ساڵێكە، لەوەتای خیلافەی عوسمانی رووخاوە، مەلا بووەتە جێگەی بێز لێكردنەوە و نووكتە لەسەر گوتن و گاڵتە پێكردنی بەردەوام. كۆمۆنیستەكان و مولحیدەكان و دووژمنانی دین، ئەم كولتوورەیان خستە نێو خەڵكەوە، ئیسلامییەكانیش بە هەمان رێچكە رەفتاریان كرد. كەواتە با بزانین ئەم بەزمە لەكوێوە سەرچاوە دەگرێت!
بۆچی ئیسلامییەكان بە چاوی ناحەز و سووكایەتیی پێكردن تەماشای مەلاكان دەكەن؟!
ئیسلامییەكان بەگشتی خەڵكێكی باش و عاتیفین. حەزیان لە چاكەیە و لە دڵسافییەوە زۆربەی جاران تێدەكەون. واتە نیەتیان باشە، بەڵام بەستەزمانن. لەیەك كونەوە، نەك تەنیا دوو جار، بەڵكو 100جاریش بگەزترێن، دیسانەوە هەر دەگەزرێنەوە! لێرەشەوە، كە دوای حیزبە ئیسلامییەكان كەوتوون لە نیەتێكی باشەوە دەیكەن، بەڵام بناخە و ئەسڵ و فەسڵی دروستبوونی ئەم حیزبانە نازانن، كە بۆ چ كارەساتێكی فیكریی دەگەڕێنەوە! كاتێكیش دەتەوێ تێیانبگەیێنیت كە حیزبە ئیسلامییەكان ئەو شتە نین و ئەو شتە نابن كە تۆ بۆیان بە دوایان كەوتووی، یەكسەر دەماریان جووت دەبێت و شێتانە دەكەونە گیانت! بێگومان بوردراون، چونكە بە دڵێكی پڕ لە عاتیفە و هەڵچوون ئەم كاردانەوە دەنوێنن . لەبەرئەوە، ئەوەی دەیزانێت پێویستە میهرەبانتر بێت و سەبر و ئارام بێت بۆ ئەوەی ئەو كەسەی نازانێـت بە تێپەڕبوونی كات حاڵیبێـت.
لە كۆتایی تەمەنی دەوڵەتی عوسمانی، كە میراتگری دەوڵەتە ئیسلامییەكانی پێشوو بوو و شەریعەت تێیدا حوكمی پێدەكرا و زانایانی ئوممەت تێیدا چاوساخ بوون، تەوژمی عەلمانیەت و ئیلحاد و دژایەتییكردنی دین دەستیپێكردبوو و كاری خۆی بەوپەڕی هێزەوە جاڕدەدا. ماسۆنیەت زۆر زیرەكانە و زۆر مەحكەمانە كاری خۆی دەكرد بۆ ریسواكردنی ئیسلام و گۆشەگیركردنی و لەنێوبردنی. جولەكەكانی ناو دەوڵەتی عوسمانی و ئەوروپییەكان و ئەمریكییەكان (بە هەردوو تەوژمی ئیلحاد و ماسۆنیەت لەلایەك و تەوژمی مەسیحیەتی سەڵیبیی لەلایەكی دیكەوە ) و ئینجا ئەوانەش كە سەر بەوان بوون لە ناوخۆ، ئەو پیلان و نەخشانەیان گەڕدا، كە بووە هۆی رووخانی دەوڵەتی عوسمانی و بڵاوبوونەوە ژەهری وەك:
ئیسلام هۆی دواكەوتنی میللەتانی رۆژهەڵاتە!
مەلاكان هێمای دواكەوتن و تاریكی و گومڕایین.
شەریعەتی ئیسلام رەق و تەق و دواكەوتنە و بە كەڵك ئەم زەمانە نایێت.
فیقهی ئیسلامی واتە كۆیلایەتی و دواكەوتن و خوڕافە و عەقڵ زیندانیكردن.
زانستی رۆژئاوا و ئایدیۆلۆجیەكانی رێگەی بەختەوەری و سەركەوتنی گەلانی رۆژهەڵاتن.
لەهەمانكاتدا، رۆژهەڵاتناسەكان كاری خۆیان دەكرد، وڵاتە زلهێزەكان كاری خۆیان دەكرد، كۆمەڵە ئیلحادییەكان و عەلمانییەكانی ناوخۆش وەك ئیتیحاد و تەرەقی، كاری خۆیان دەكرد، كە بە ناوی تێكۆشان لە دژی زوڵم و خەباتكردن لەپێناو ئازادی و بەختەوەری، دژی دەوڵەتی عوسمانی و ئیسلام دەوەستانەوە و خەڵكیان لەخشتە دەبرد. ئەم پیلانانە لەمێژبوو لە ئارادابوون . لەولاشەوە هەندێك كەسی سەرسام بە رۆژئاوا و پێشكەوتنی، لەرزۆك و بەزیو، وەك رەفاعە رافع تەهتاوی لە میسر، هەروەها رۆشنبیرانی دیكەی سەردەمی محەممەد عەلی پاشا (كە خدێوی سپۆنسەر و راگریان بوو) ببوونە كۆیلەی فەرەنسا، كەوتنە گیانی ئیسلام و رەواجدان بە كولتووری رۆژئاوا و ریسواكردنی ئیسلام و زانایانی ئیسلام. لە رۆژهەڵاتی ناوچەی ئیسلامیشدا، واتە لە ئێران، كەسێكی فێڵبازی وەك جەمالەدینی ئەفغانی پەیەدابوو، كە شیعەیەكی ئێران بوو، دواتر بووە بەهایی و ماسۆنیی، هات بۆ ناو جەرگەی موسڵمانان و كڵاوی خستە سەری زۆر كەس و دەروێش و موریدی بۆ پەیدابوو. لە توركیاش كۆیلەكانی رۆژئاوا دەستیان بە پیلان و ژەهرەكانیان كرد. كەسانی وەك نامیق كەمال ، ئیبراهیم شناسی و دواتر ئیبڕاهیم ساترۆڤا و عەبدوڵلا جەودەت (كە كوردە) و بەهادین شاكر، هەمان رۆڵ و پیلانی، هاوشێوەكانیان لە میسر، لە ناوجەرگەی ئیستەنبووڵی عوسمانیی بەرپاكرد.
بەڵام ئەوانەی لە وڵاتانی عەرەبی كاریگەری خۆیان جێهێشت، خەتی جەمالەدین ئەفغانی و رەفاعە رافع تەهتاوی بوون و زیاتریش خەتی بەناو ئەفغانی.
جەمالەدینی ئەفغانی (كە ئەفغانی نییە) و خەڵكی ئێرانە و شیعە بوو، دواتر بووە بەهایی (دینێكی نوێیە لە شیعە جیا بووەوە و حوسێن عەلی نووری، ناسراو بە بەهائوڵلا، لەنیوەی دووەمی سەدەی نۆزدەم وەك ئایینێكی سەربەخۆ دایمەزراند). جەمالەدین ئەفغانی، ماسۆنی بوو و لە ماسۆنیەتدا پلەی تەواوی هەبوو و سەرۆكی مەحفەلی ماسۆنی بوو لە میسر (مەحفەلی كەوكەب ئەلشەرق)، كە ئیبراهیم تۆفیق پاشاش یەكێكبوو لە ئەندامەكانی (ئەم تۆفیق پاشایە دواتر بووە دووژمنێكی سەرسەختی دەوڵەتی عوسمانی، هەرچەندە خۆی وەزیری دەرەوە بوو، بۆ چەندین ساڵ، چەندین پۆستی گەورەی لەنێو ئەم دەوڵەتەدا هەبوو)! قوتابییەكانی ئەفغانی ئەمانە بوون: شێخ محەممەد عەبدە و قاسم ئەمین و عەبدولڕەحمانی كەواكیبی و سەلیم عەنجووری (مەسیحیە) و زۆری دیكەش. ئەفغانی و قوتابییەكەی محەممەد عەبدە، جەختیان لەسەر ئەوە دەكردەوە، كە دەبێ سەری دین بە شمشێری دین خۆی ببڕدرێت، هەروەك چەندینجار ئەمەیان بە ئاشكرا دەربڕیوە. تەنانەت شەیخولئیسلامی دەوڵەتی عوسمانی مستەفا سەبری دەڵێ "ئەفغانی و عەبدە ویستیان دەوری مارتن لۆتەر و جۆن كالڤنی پرۆتستانت لەنێو ئیسلام ببینن، كە بۆیان نەلوا، لەژێرەوە یارمەتی ئیلحادی دەمامكداریان دا".
محەممەد عەبدە نامەی هەیە بۆ مامۆستاكەی خۆی (جەمالەدین ئەفغانی) ناردووە، پڕە لە كوفر و شیركی تەواو. تەنانەت رەشید رەزا كە قوتابی خۆی بوو سەری لەم نامەیە سووڕمابوو!
ئەمانە باوكان و مامۆستایان و ریش سپیانی هەموو بزووتنەوە ئیسلامییەكانن! چۆن؟
ئیسلامییەكان لە دوو سەرچاوە دروستبوون. سەرچاوەی یەكەم ئیخوانولمسلمینە بە رێبەڕایەتی موڕشید "إمام" حەسەن بەننا. سەرچاوەی دووەمیش وەهابیەتە بە رابەرایەتی "إمام" محەممەد عەبدولوەهاب كە یەكێكبوو لەو دوو دینگەیەی دەوڵەتی سعودی بەسەریەوە دامەزرا (دینگەكەی دیكە بنەماڵەی ئال سعودن".
حەسەن بەننا قوتابیەكی بەوەفا و خوێن گەرمی محەممەد عەبدە بوو. حەسەن بەننا نە زانای شەرع بوو، نە فەقیهـ بوو. گەنجێكی 22 ساڵ بوو و رێكخراوی ئیخوانولمسلمینی دروستكرد . خوێندنی رەسمی تەواوكرد كە پەیمانگەی مامۆستایان بوو، لە بەشی زمانی عەرەبی و دواتر بووە مامۆستای زمانی عەرەبی. دواتر بەهۆی تێكەڵاوی لەگەڵ سیاسەت و حیزبایەتی، دەستیكرد بە نووسینی وتار، بەوهۆیەشەوە وەك رۆژنامەنووسیش حسێبدەكرێت . لەوە بترازێت، حەسەن بەننا نە زانا بوو نە فەقیهـ و نە شێخێكی شەرعناس وەك ئەوەی ناسراوە لای موریدەكانی. بەننا كەوتە ژێر كاریگەری ماسۆنیەت و ئەو ئەدەبیاتانەی بانگەشەی مۆدێرنێتی و ریفۆرم و پێشكەوتن و ئازادی و نوێخوازییان دەكرد. ئێستا ئێمە دەكرێ بە نیەتێكی پاكەوە بڵێین: بەننا لە دڵسۆزی و خەمخۆری بۆ ئیسلام كەوتە نێو ئەم باس و خواسەوە. بەڵام خۆ ناكرێت ئینكاری بكەین كە ئەم قوتابخانەیە تەنیا سەرچاوەی بیركردنەوەی بەننا بوو. لەوانەیە بەننا نەیزانیبێت، كە پیلان و ئامانجی سەرەكی ئەم كایە لە هەناوی ماسۆنیەت و ئیلحاد و دووژمنایەتی بۆ ئیسلام هەڵقوڵاوە. بەڵكو ئەو وایزانیوە دەبێ ئیتر خزمەتی ئیسلام بەوشێوە بكرێـت، كە ئەدەبیاتی تەهتاوی و ئەفغانی و عەبدە و كەواكیبی و بانگەشكەرانی پێشكەوتنخوازی و ریفۆرم و نوێخوازیی دەیكەن، لە ئیستەنبوول و میسر و شوێنەكانی دیكە. ئیتر بەم رێچكە كرایە نوێكەرەوەی ئیسلام لە میسر، كە ئێستا ئەو نوێكردنەوە بە روونی بە سەر رووخساری ئیخوانەكانەوە دیارە! ئەو قوتابخانەی كە حەسەن بەننا كەوتە ژێر كاریگەری، مەلاكانی پێ نموونەی دواكەوتن و كەللـەپووچیی و داتەپین بوو. كەوتنە ژێر كاریگەری فەلسەفەی رۆژئاوا، كە پێیان وابوو دین و فیقهـ و شەرع دەبێـت نوێبكرێنەوە، لەگەڵ گۆڕانكاریەكانی سەردەم بگونجێت. بەڕای ئەمانە، سەرجەم تەفسیر و حەدیس و فیقهی پێشوو بۆ زەمانی خۆی بوو، ئێستا ئیسلام دەبێ بەرگێكی سەردەمیانە بكاتە بەر. لێرەشەوە دەبینی، ئیخوانەكان زۆر جەخت لەسەر ئەوە دەكەنەوە كە پێویستە مۆدێرنانە دەركەون و پێشكەوتووخواز خۆیان نیشانبدەن. هەر لەبەرئەوەشە واناسراون كە حیزبی ئەفەندییەكانن، وەك بڵێی شەرمیان بە مەلا و جلوبەرگ و مەزهەری ئیسلامی بێـت. بەڵام بەو دوواییانە كە بینیان لەم لایەنەوە زەربەی زۆریان پێكەوتووە، چینی مەلا و فەقیهـ لە گەڵیان نییە، هەڵسان بە دانانی جبە و مێزەر بەسەر چەند كەسێكی خۆیان. هەروەها ئیخوان خۆیان بە عەلمانی و دیموكراتخواز دەزانن و شێخ و ئیمامی گەورەیان یوسف قەرەزاوی دەڵێت ئێمە لەپێناو دیموكراسی دەجەنگین و شەڕ دەكەین! سەیری ئەم یوتیوبە بكە:
کلیک لەسەر ئەم لینکە بکە
لە دامێنی ئیخوانولمسلمین، سەرجەم پارت و گرووپ و حیزبە ئیسلامییەكان دروستبوون. لێرەوە هەندێكیان بە عەقیدەی وەهابیەت موتربە بوون. هەرچەندە خودی حەسەن بەننا لە وەهابییەكان نزیكبوو و عەقیدەی وەهابیەتی هەڵگرت و پەیوەندی لەگەڵ وەهابیەت تووندو تۆڵ بوو و تەنانەت دامەزراندنی ئیخوانولمسلمین لەژێر كاریگەری بڵاوبوونەوەی وەهابیەت بوو لە سعودیەی ئێستا و دەوروبەری.
وەهابیەت:
وەهابیەت لەسەر دەستی محەممەد بن عەبدولوەهاب دامەزرا، كە بە ناوی جەنگكردن لەگەڵ شیرك و بیدعە و كوفر و خوڕافات، كەوتە گیانی موسڵمانانی دوورگەی عەرەب و قەتڵوعامیكردن. وەهابیەت تەكفیری سەرجەم ئوممەتی ئیسلام دەكات، تەنیا ئەوانە نەبێ كە عەقیدەیان عەقیدەی وەهابیەتە. وەهابییەكان دەڵێن ئەشعەریەكان و ماتوریدیەكان و سۆفیەكان و سەرجەم فیرقە و مەزهەبەكان، گومڕا و لە رێ لادەر و ئەهلی بیدعە و شیرك و كوفرن، جگە لە "ئەهلی سوننە و جەماعەت" نەبێت. مەبەستیشیان لە ئەهلی سوننە و جەماعەت وەهابییەكانە بە تەنیا. كە پێیاندەڵێیت، بەڵام، بەدرێژایی مێژوو زۆرینەی موسڵمانان شوێنەكەوتەی چوار مەزهەبەكە بوون لە فیقهدا، لە عەقیدەشدا شوێن كەوتەی هەردوو ئیمامی ماتوریدیی و ئەشعەری بوون، دەڵێن راستە وایە. بەڵام سەرجەم ئەمانە ئەهلی بیدعە و گومڕایی بوون. كەواتە وەهابییەكان تەنیا خۆیان بە راست دەزانن، سەرجەم موسڵمانان بە درێژایی مێژوو بە ئەهلی بیدعە و شیرك و كوفر دەزانن و تەكفیریان دەكەن. ئەو گرووپ و حیزب و كۆمەڵانەی ئیسلامی، لە دونیای ئەمڕۆماندا، زۆرینەیان بەهۆی پارە و پوڵی سعودیە، عەقیدەیان عەقیدەی وەهابییەتە، كە لای زانایان و فوقەهای ئیسلامدا بە عەقیدەی تەجسیم و تەشبیهـ ناسراوە، مرۆڤی موسڵمان ئەگەر ئەم عەقیدەیەی پێ راست بێت پێی كافر دەبێـت! بۆ نموونە، وەهابییەكان پێیانوایە خودای متعال خودی خۆی لە ئاسمانە و بەسەر عەرشەوە نیشتووە و دەست و قاچی راستەقینەی هەیە و ...هتد. كە ئەمانە لەگەڵ عەقیدەی ئەهلی سوننە و جەماعەت بەدرێژایی 14 سەدە یەكناگرێتەوە، كە وەك گوتمان بازنەی چوار مەزهەبی فیقهی (حەنەفی و مالیكی و شافیعی و حەنبەلی) و دوو رێچكەی مودەووەنی عەقیدەی (ماتوریدیی و ئەشعەریی) دەیانگرێتەوە. وەهابییەكان تەكفیری ئەهلی ناو ئەم بازنەیە دەكەن. لەبەرئەوەش پێیان ئاساییە بیانكوژن، وەك ئەوەی مامۆستاكەیان عەبدولوەهاب لە نەجد و حیجاز دژ بە هەزاران موسڵمان كردی و قەتڵوعامیكردن. داعش و قاعیدە و گرووپەكانی دیكە وەهابیەكانیشمان بینین ، چۆن دەكەونە گیانی موسڵمانان و لێیاندەكوژن، پێش هەمووشیان مەلاكان. چونكە مەلاكان، بەلای ئەوانەوە، ئەهلی بیدعە و جەهل و نەفامی و شیرك و گومڕایین. لەسەرجەم جیهانی ئیسلامدا ئەم حاڵەتانە روویانداوە، كە گرووپە بەناو ئیسلامییە جیهادییەكان سەری مەلا و زانای موسڵمانیان بڕیوە و هەوڵیانداوە ریسوایان بكەن .
تەنانەت لەنێوان خۆیان ئەم بەزمە تووند و تۆڵە، وەك تێڕوانینی وەهابییەكان بۆ شێخەكانی ئیخوانولمسلمین، شێخە سەلەفییەكان لەنێوان خۆیان وەك بەناو جیهادی، بەرامبەر بە مەدخەلی و جامی، گرووپەكانی وەك داعشیش بەرامبەر بە گرووپە بەناو جیهادییەكانی دیكە، پێشووتریش هەڵوێست و تێڕوانینی جەماعەی بەناو جیهادی میسری لە ئەفغانستان بەرامبەر شێخ عەبدوڵلا عەزام و ئەحمەد شاە مەسعود و كەسایەتیەكانی دیكە شتێكە نكۆڵیی لێناكرێت. هەر ئەم گرووپە بوو دواتر لەگەڵ چەندێكی دیكە قاعیدەیان پێكهێنا و بوونە بەڵایەكی هەرە گەورە بۆ ئوممەتی ئیسلام، كە ئێستاش پێیەوە دەتلێتەوە.
ئا لەم دوو سەرچاوەوە كولتووری دووژمنایەتیی مەلا و زانایانی ئیسلام سەریهەڵداوە، كە ئێستا كولتوورێكی باوە لەنێو ئیسلامییەكان، وێڕای عەلمانییەكانیش كە ئەویش بۆخۆی بابەتێكی دیكەی پڕ كارەساتە!
كوردستان و هەڵبژاردن:
ئەمڕۆ لە كوردستان، چەند مەلایەك خۆیان لەسەر لیستی پارتی و یەكێتی كاندید كردووە. حیزبە ئیسلامییەكان، كە ناحەز و ناكۆكن لەگەڵ یەكتر و 30 ساڵە خزمەتكار و گەڕسۆنی نێو سیاسەتی پارتی و یەكێتین، كەوتوونەتە گیانی ئەم مەلایانە، گوایە نۆكەری عەلمانیەت و دیموكراسین . ئەمە بۆ خۆی نووكتەیەكی خوێناوییە. چونكە، ئیسلامیسەكان گەورەترین یاریكەری نێو عەلمانیەت و دیموكراسی و پەرلەمان و هەڵبژاردنن. لە پەرلەمان و حكومەت بەشداریان كردووە. تەنانەت دژی یەكتر وەستاونەتەوە لەپێناو كورسی و دەنگ و مەنسەب. كەچی ئەمڕۆ دەیانەوێ مەلا ریسوا بكەن چونكە خۆی لەسەر لیستێك كاندید كردووە كە لیستی حیزبێكە ئیسلامیی نییە ، بەڵام دەسەڵاتداری فیعلیی كوردستانە، كە 30 ساڵە حیزبە ئیسلامییەكان لە ژێر باڵیدا سیاسەت دەكەن، گوایە لەپێناو ئیسلامدایە، بەڵام كاری مەلا بەڕای ئیسلامییەكان لەپێناو عەلمانیەتدایە!
دووژمنداری ئیسلامییەكان بۆ مەلاكان كۆنە و باكگراوەندی ئایدیۆلۆجی لە دواوەیە. ئەم باكگراوەندەش لە دوو سەرچاوەی دەرەوەی ئیسلام و مێژووی موسڵمانان سەری هەڵداوە. سەرچاوەی یەكەم ماسۆنیەت و تەوژمی زاڵ و سەركەوتووی رۆژئاوایە، كە یەكێك لە بەرهەمەكانی ئیخوانولمسلمین و بزووتنەوە ئیسلامییەكانە، سەرچاوەی دووەمیش وەهابیەتە، كە گرووپێكە سەرجەم موسڵمانان بە گومڕا و كافر و سەر لێشێواو دەناسێت، كوشتنیان بە حەڵاڵ دەزانێـت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ