لە کۆیە سەنتەرێکی تایبەت بە خانەنشینان دەکرێتەوە

فازڵ شەوڕۆ، شاعیر و خانەنشینە لە کۆیە لەبارەی سەنتەرەکەوە بە رووداوی گوت، "هیوادارین هەموومان وەک گلێنەی چاوی خۆمان بیپارێزین و خزمەتی بکەین، ئەوەش بکەینە سەرەتایەک بۆ ئەوەی پرۆژەی دیکەی بەدوادابێت، سپۆنسەرمان بکەن و یارمەتیمان بدەن."

مەولوود ژاکاو، خانەنشینێکی دیکەیە دەڵێت، "بڕیارمداوە بێم بۆ ئێرە و هاوڕێیەکانم ببینم، پێویستە ئەوانیش بێن بۆ ئێرە و پاڵپشتی ئێرە بکەن، بۆ ئەوەی دوانەکەوین و پێشبکەوین."

سەنتەری تایبەت بە خانەنشینانی کۆیە، لە چەند بەشێک پێکهاتووە لەوانە، قاوەخانە، کتێبخانە، وەرزش ،کلینیکی پزیشکی، سەرتاشخانەی بێ بەرامبەر و هۆڵێکی تایبەت بە ژنانی خانەنشین.

لەیلا تاهیر حەوێزی، ژنێکی خانەنشینە سەنتەرەکەی بە پرۆژەیەکی باش ناوبرد و گوتی، "دەستی هەموولایەک خۆشبێت، بڕیارمانداوە گروپێکی خۆمان هەبێت، بۆ ئەوەی بێینە ئێرە و خزمەتی یەکدی بکەین."

سەنتەرەکە لە نێو بازاڕی کۆیە، لەسەر رووبەری دوو هەزار و 500 مەتر چوارگۆشە بە تێچووی 600 ملیۆن دینار لەلایەن شێخ باز بەرزنجی دروستکراوە، خەرجی بەڕێوەبردنی سەنتەرەکەشی لە ئەستۆ گرتووە. 

رۆژ سالار، بەرێوەبەری پەیوەندییەکانی دەزگای شێخ باز بەرزنجی، رایگەیاند، " کۆیە خاوەنی کۆمەڵێک خەڵکی خاوەن بیر و خانەنشینی باش و رۆشنبیرە، خزمەتکردنیان زۆر پێویستە."

سەنتەری خانەنشینانی کۆیە، هاوشێوەی هەمان سەنتەری خانەنشینانی باخی شارە لە هەولێر، بڕیاریشدراوە باجی تایبەت بۆ هەر خانەنشینێک دروستبکرێت، کە بیەوێت لە سەنتەرەکە سوودمەندبێت.