رووداو - هەولێر
لاهور شێخ جەنگی، بەڕێوەبەری ئاژانسی پاراستن و زانیاری/ زانیاری رایگەیاند، خۆپیشاندان مافێکی رەوای خەڵکە، بەڵام تووندوتیژی لە خۆپیشاندانەکاندا قبوڵناکەن.
دوای خۆپیشاندانەکانی ئەمڕۆی شار و شارۆچکەکانی کوردستان، لە توویتێکدا لاهور شێخ جەنگی رایگەیاند، خۆپیشاندان مافێکی دیموکراسییە و داواکانی خەڵکیش رەوان بۆ بۆ چاکسازی و ژیانێکی باشتر.
لاهور شێخ جەنگی رایگەیاندووە "داوا لە خۆپیشاندەران دەکەم بە هێمنی و دوور لە تووندوتیژی بجوڵێنەوە، چونکە تووندوتیژی قبوڵناکرێت. دەبێ ئاسایش و سەلامەتی کوردستان بپارێزین".
لە راگەیێندراوێکیشدا، بەڕێوەبەری ئاژانسی پاراستن و زانیاری/ زانیاری دەڵێت "دەنگی خۆمان دەخەینە پاڵ داوا رەواکانی خەڵک و خۆمان بە پشتیوانی خەڵکی وڵاتەکەمان دەزانین لەپێناو باشترکردنی دۆخی گوزەران و حوکمڕانیەکی شایستە، بەڵام داواکارین کە خۆپیشاندانەکان بەئاراستەی هەڵەدا نەبرێن و پشێوی لێنەکەوێتەوە، دۆخی ئاسایش و ژیانی هاووڵاتییان نەکەوێتە مەترسییەوە".
لاهور شێخ جەنگی، کە برازای جەلال تاڵەبانییە، ئاماژەی بەوەشکردووە، پاراستنی دامودەزگا مەدەنی و حکومییەکان و بارەگاکان ئەرکی هەموو لایەکە، نابێت بەهیچ جۆرێک پەنا بۆ سووتاندن و تووندوتیژی ببرێت، دەبێ خەڵک خۆیان لە ئاژاوەنانەوە بپارێزن، چونکە ئەوە دەبێتە بەلاڕێدابردنی داوا رەواکانیان و رێگر دەبێت لەهەر چاکسازی و بونیادنانێک لە وڵاتدا. "ئێمەش بەهەموو شێوەیەک رێگر دەبین لە هەر دەستێک بۆ نانەوەی پشێوی و کاولکاریەک لە وڵاتدا".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ