تاوەکو چاککردنەوەی ئیفراز دووی هەولێر بە تانکەر ئاو دەگەیێندرێتە ماڵەکان

ئەمڕۆ دووشەممە، بەرپرسێکی باڵای کارگێڕی لە هەولێر بە تۆڕی میدیایی روداوی گوت، "ئیفراز دوو کێشەی کارەبای هەیە و بەهۆی هەورەبرووسکەوە کێشەکان دروستبوون، بۆ چاککردنی دەبێت پارچەکانی لە دەرەوەی وڵاتەوە بهێندرێن، هەرکات گەیشتن راستەوخۆ چاک دەکرێتەوە".

ئەو بەرپرسە ئاماژەی بەوە کرد، تاوەکو چاککردنەوەی کێشەی ئیفراز دوو، لە رێگەی هێڵی گەرمەوە ئاو بە تانکەر دەگەیێننە ماڵەکان. گوتیشی، "100% ناتوانرێت پێداویستی ئاوی ئەو گەڕەکانە پڕبکرێتەوە، بەڵام بەگوێرەی پێویست هاوکارییان دەکرێت".

لە راگەیێندراوێکدا حکومەتی هەرێمی کوردستان دەڵێت، "بەهۆی وەستانی پرۆسەی بەرهەمهێنانی ئاوی پاک لە پرۆژەی ئیفرازی دوو لە شاری هەولێر، لە ئەنجامی لێدانی هەورەبرووسكە لە بەشی كارەبایی پرۆژەكە، بەشێك لە گەڕەكەكانی شاری هەولێر بێ ئاو بوون".

بۆ بەهاناوەچوون و دابینكردنی خزمەتگوزاریی ئاو لەو گەڕەكانە، دوو گەرمەهێڵی داواكردنی هاوكاری لەلایەن بەڕێوەبەرایەتیی ئاو و ئاوەڕۆی هەولێر دابین كراون کە بریتین لە (07508515105 - 07504467378).

پڕۆژەکانی ئیفراز نیوەی ئاوی خواردنەوەی سنووری هەولێر دابین دەکەن. بەشەکەی دیکەی شارەکە پشت بە ئاوی بیرەکان دەبەستێت.

لە هەولێر سێ پرۆژەی ئیفراز هەن؛ پرۆژەی ئاوی ئیفراز یەک ساڵی 1967؛ ئیفراز دوو ساڵی 1982 و ئیفراز سێش ساڵی 2007 کەوتوونەتە کار.