..
رووداو - سلێمانی
ئەمشەو (20-12-2016) شەوی یەڵدایە.
بە یەكەم شەوی زستان دەگوترێت شەوی یەڵدا، كە درێژترین شەوی ساڵە و دوایین شەوی وەرزی پایزە.
بەپێی زۆرینەی لێكدانەوەكان، یەڵدا وشەیەكی سریانییە و بەمانی لەدایكبوون دێت.
بەشێك لە مێژوونووسانیش دەڵێن، زەردەشتییەكان زۆرترین بایەخیان بەو شەوە داوە و لای ئەوان بە مانای لەدایبكوون دێت، كە لەو شەوەدا رۆژ بەسەر شەودا زاڵ بووە، ئەوەش مانای سەركەوتنی رووناكییە.
خەڵکی کوردستان و ئێران بە درێژترین شەوی ساڵ و شەوی دەستپێکردنی زستان دەڵێن، شەوی چلە یان یەڵدا و ساڵانە بە رێوڕەسم یادی ئەو شەوە دەکەنەوە.
لەو شەوەدا 14 کاژێر تاریکی، بەشێکی گۆی زەوی دەگرێتەوە و رۆژەكەشی کورتترین رۆژی ساڵ دەبێت. دوای ئەوە رۆژ بە رۆژ، شەو بەرەو کورتبوونەوە دەچێت و تاوەكو یەکەم شەوی وەرزی هاوین، رۆژ درێژ دەبێتەوە.
لە کۆنەوە، بارینی بەفر و باران لە شەوی یەڵدا بە نیشانەی ساڵێکی پڕ خێر و بێر دەزاندرێت.
بەشێکی زۆری خەڵک بەتایبەت لە رۆژهەڵاتی کوردستان وەک نەریتێکی کۆن ئەو شەوە لەدەوری یەک کۆدەبنەوە و بەڕازاندنەوەی سفرە و خوانیان شەوی یەڵدا بەڕێدەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ