رووداو دیجیتاڵ
لە گوندێکی سەر بە قەزای چەمچەماڵ، دوو ماڵبات لەسەر زەویوزار بووە شەڕیان و "سێ کەس کوژراون و کەسێکی دیکەش برینداربوون."
شەڕەکە لە گوندی قاسم بەگزادەی ناحیەی شۆڕشی سەر بە قەزای چەمچەماڵ روویدا. بەگوتەی هاوتا عەزیز، بەڕێوەبەری ناحیەی شۆڕش، دوو ماڵباتەکە ئامۆزای یەکترن و "دوو لە کوژراوەکان بران."
بەگوێرەی زانیارییەکانی تۆڕی میدییای رووداو، کوژراو و بریندارەکەی دیکەش برای یەکدی بوونە.
ئەوانەی کوژراون بریتین لە هێمن محەممەد، شۆڕش محەممەد و ساڵح شەریف.
بەگوتەی کەسوکاری کوژراوەکان، دوو ماڵباتەکە لە کۆنەوە کێشەیەکی کۆمەڵایەتییان هەبووە، وردە وردە کێشەکە سەری هەڵداوەتەوە و ئێوارەی ئەمڕۆ، لەسەر زەویوزار تەقەیان لە یەکدی کردووە و لە ئەنجامدا سی کەس گیانیان لەدەستداوە.
دایکی یەکێک لە کوژراوەکان بە رووداوی گوت، کوڕەکەی ئێوارەی ئەمڕۆ چووە باخەکەی ئاو بدات و نانی ئێوارە لەوێ بخوات، بەڵام لەوێ تووشی ئەم کێسەیە دەبێت و دەکوژرێت.
دوو ماڵباتەکە کێشەکەیان داوەتە دەست یاسا و داوا دەکەن لێکۆڵینەوە لە رووداوەکە بکەن و ئەوان دەستنیشانی بکەن، کامەیان هۆکاری دەستپێکردنی تەقەکردنەکە بوون.
.jpg&w=3840&q=75)
