رووداو دیجیتاڵ
مانگی سووری کورد لە رۆژئاوای کوردستان رایگەیاند، بەهۆی گەمارۆدان و سەرماوە، منداڵێکی دیکەی دانیشتووی کۆبانی گیانی لەدەستدا و بەو جۆرەش ژمارەی ئەو منداڵانەی لە شارەکەی رۆژئاوای کوردستان بەو هۆیەوە گیانیان لەدەستدا بووە 5 کەس. هاوسەرۆکی مانگی سوور دەڵێ، تەمەنییان دوو مانگ بۆ چوار ساڵن.
ئەمڕۆ شەممە 24-01-2026، مانگی سووری کورد لە رۆژئاوای کوردستان لە راگەیێندراوێکدا رایگەیاند: "بەهۆی گەمارۆی سەر کۆبانی، تاوەکو ئێستا پێنج منداڵ کە منداڵی شیرەخۆرەشیان تێدایە گیانیان لەدەستداوە".
هەدیە عەبدوڵڵا، هاوسەرۆکی مانگی سووری کورد لە رۆژئاوای کوردستان بە تۆڕی میدیایی رووداوی گوت: "منداڵەکان بەشێکیان دوێنێ گیانیان لەدەستداوە؛ تەمەنیان دوو مانگ، سێ مانگ، دوو ساڵ و چوار ساڵن".
مانگی سووری کورد رایگەیاندووە: "بەهۆی دابەزینی زۆری پلەی گەرما، نەبوونی سووتەمەنی بۆ گەرمکردنەوە و کەمیی پێداویستییە پزیشکییە بنەڕەتییەکانەوە منداڵەکان گیانیان لەدەستداوە".
چەند رۆژێکە شاری کۆبانی لە رۆژئاوای کوردستان بە تەواوی گەمارۆدراوە و رێگەکانی شارەکە بە دەرەوە بە تەواوی داخراون و کارەبا، ئاو و دەرمانی لێبڕاوە.
لە راگەیێندراوەکەدا هاتووە: "بەردەوامیی گەمارۆ مەترسییەکی گەورە و راستەوخۆ لەسەر ژیانی منداڵان، نەخۆشان و بەساڵاچووان دروست دەکات. بانگەوازی کۆمەڵگەی نێودەوڵەتی و رێکخراوە مرۆییەکان و مافەکانی مرۆڤ دەکەین کە دەستبەجێ دەستوەردان بکەن بۆ شکاندنی گەمارۆکە و دابینکردنی سووتەمەنی و پێداویستییە فریاگوزارییەکان".
هاوسەرۆکی مانگی سوور بە رووداوی گوت: "هاوکاریمان ئامادەیە و بەس رێگەیەکی ئارام هەبێ دەستبەجێ هاوکاری دەگەیێنینە کۆبانی".
هەر ئەمڕۆ موسا ئەحمەد، سەرۆکی دەزگای خێرخوازی بارزانی بە رووداوی گوت: "لە هەموو لایەکەوە لەسەر هێڵین بۆ کردنەوەی رێگەیەک بە مەبەستی گەیاندنی هاوکاری خێرا بە شاری کۆبانی".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ