دوایین زانیاری لەبارەی گرژیی نێوان مامۆستایانی ناڕازی لە سلێمانی و شۆفێرانی بارهەڵگر

 

شەوی دووشەممە، پێشەوا بەختیار، پەیامنێری تۆڕی میدیایی رووداو لە سلێمانی گوتی: "هێزە ئەمنییەکان کۆتاییان بە خۆپێشاندانەکان هێناون و بەشێک لەوانەی بوونەتە هۆی گرژییەکان دەستگیرکراون."

 

پەیامنێری رووداو باسی لەوەشکرد، کە ئێستا خێوەتی مامۆستایان لەلایەن هێزێکی ئاسایشەوە هەڵگیراوە و کۆتایی بە خۆپێشاندانەکاندا هاتووە.

 

 

بەهۆی خۆپێشاندانی مامۆستایانەوە قەرەباڵخییەکی زۆر لەسەر رێگەی عەربەت - سلێمانی دروست ببوو، شۆفێرانی بارهەڵگر و تانکەر نەیاندەتوانی خۆپێشاندانەکە تێبپەڕێنن، ئەمشەو لەگەڵ "چەند مامۆستایەکی ناڕازی" بووەتە دەمەقاڵێ و دەنگە دەنگیان، شۆفێرەکان بەنێو خۆپێشاندانەکەدا دەڕۆن. 

 

بەگوێرەی ڤیدیۆیەک کە بۆ رووداو نێردراوە چەند کەسێک بەرد لەو تانکەرانە دەگرن کە تێدەپەڕن و ئەو هاونیشتمانییەی ڤیدیۆکەی ناردووە و دەڵێت: "ئەوانە مامۆستای ناڕازین و وەکو کاردانەوەیەک بۆ رۆیشتنی تانکەرەکە و شکاندنی سنووری خۆپێشاندانەکە، ئەو کارە دەکەن." 

 

پێشەوا بەختیار، پەیامنێری رووداو گوتی، هێزە ئەمنییەکان رێگە بە کەناڵەکانی راگەیاندن نادەن لە شوێنی رووداوەکە زانیارییەکان بگوازنەوە، هەواڵی هێورکردنەوەی بارودۆخەکە دەدەن.