بە ئامادەبوونی نوێنەری سەرۆک بارزانی پەردە لەسەر ناوی دوو شەقامی هەولێر لادرا

 

 

ئەمڕۆ یەکشەممە، ئومێد خۆشناو، پارێزگاری هەولێر رایگەیاند، "لە چوارچێوەی بەردەوامی پڕۆژە خزمەتگوزارییەکان و وەک وەفادارییەک بۆ مێژووی پڕ لە قوربانیدانی گەلی کوردستان، ئێوارەی ئەمڕۆ یەکشەممە 2026.5.24، بە ئامادەبوونی رێزدار سیداد بارزانی، نوێنەری جەنابی "سەرۆک مەسعود بارزانی" و  بەڕێز فازڵ میرانی، بەرپرسی دەستەی كارگێڕی مەكتەبی سیاسی و ژمارەیەکی تر لە ئەندامانی دەستەی کارگێڕی و مەکتەبی سیاسی و كۆمیتەی ناوەندی پارتی دیموکراتی کوردستان، وەزیری شارەوانی، پارێزگاری هەولێر، بەرپرسی لقی 2 و ژمارەیەكی بەرچاو لە بەرپرسانی دیكەی حیزبی و حکومی، لە رێورەسمێكی شایستەدا پەردە لەسەر تابلۆی ناوی دوو شەقامی سەرەکی لادرا کە بە ناوی سەرکردە و تێکۆشەرانی مەزنی بزووتنەوەی رزگاریخوازی کوردستان (مامۆستا عەلی عەبدوڵڵا، مامۆستا محەممەد مەلا قادر) کراون".

 

له‌ رێوره‌سمه‌كه‌دا، پارێزگاری هه‌ولێر گوتارێکی پێشکەش کرد و رایگەیاند: "ئەمڕۆ لێرە کۆبووینەتەوە تاوەکو پێزانین و ئەمەکداری خۆمان بۆ ئەو دوو تیكۆشەرە مەزنەی خەباتی گەلەکەمان دووپات بکەینەوە، ناونانی ئەم شەقامە ستراتیژیانە تەنیا کارێکی کارگێڕی نییە، بەڵکو چەسپاندنی ناسنامەی نەتەوەیی و مێژوویی هەولێری پایتەختە".

 

ئومێد خۆشناو گوتیشی، "هەولێری پایتەخت لەژێر سێبەری کابینەی نۆیەمی حکومەتی هەرێمی کوردستاندا، هاوتەریب لەگەڵ گەشەی خێرای ئاوەدانی و ژێرخانی ئابووری، رێز لە خەباتی نەوەکانی رابردووش دەگرێت. ئەم دوو تێکۆشەرە خوالێخۆشبووە تەمەنی خۆیان بەخشییە دۆزی رەوای گەلەکەمان، و هێشتنەوەی ناویان لەسەر شاڕێگاکانی هەولێر، پەیامێکە بۆ نەوەکانی داهاتوو کە پایتەختی هەرێمی کوردستان هەرگیز رابردوو و قارەمانەکانی خۆی لەیاد ناکات".

 

پارێزگاری هەولێر ئاماژە بەوە دەکات، ناونانی ئەو دوو شەقامە "لە چوارچێوەی پلانی گشتگیر و ستراتیژی پارێزگای هەولێر و وەزارەتی شارەوانی دێت بۆ رێکخستنەوەی نەخشەی شار و ئاسانکاری هاتووچۆ، ئەو دوو شەقامە نوێیەی کە ناونراون، شادەماری سەرەکی بەستنەوەی چەندین گەڕەک و ناوچەی گرنگی پایتەختن، کە هەم کێشەی قەرەباڵخی کەمدەکەنەوە و هەمیش دیمەنێکی شارستانی و مۆدێرن بە شارەکە دەبەخشن".