رووداو دیجیتاڵ
رۆژی شەممە، باوکێک و دوو کوڕی کە بۆ گەشت و سەیران لە بەغداوە چووبوونە گوندی بۆگد لە سنووری قەزای کۆیە، لە ئاوی زێی بچووک خنکان. تاوەکو ئێستا تەرمی یەکێک لە منداڵەکان نەدۆزراوەتەوە و کەسوکارەکەیان داوای هاوکاری دەکەن.
کەسوکاری قوربانییەکان، کە لە بەغداوە چوونەتە کۆیە، بە حەسرەتەوە لەو شوێنە دەڕوانن کە ئازیزانیانی لێ خنکاون و چاوەڕێی دۆزینەوەی تەرمی منداڵە ونبووەکەیان دەکەن.
محەممەد رەشید، برای یەکێک لە قوربانییەکان بە تۆڕی میدیایی رووداوی راگەیاند: "داواکارین لە هەموو لایەک؛ پێشمەرگە، ئاسایش و حکومەت کە هاوکاربن تاوەکو تەرمی سێیەم لە ئازیزانمان بدۆزینەوە. سوپاسی خوا دەکەین ئارامیمان پێببەخشێت لەم کارەساتەی بەسەرماندا هاتووە."
رووداوەکە رۆژی شەممە، 08-06-2024، روویدا، کاتێک دکتۆر خالید رەشید لەگەڵ خێزانەکەی بۆ گەشت چوونە سەیرانگای گوندی بۆگد، بەگوێرەی زانیارییەکان، منداڵە 7 ساڵانەکەی بەناوی عەبدولڕەحمان، دەکەوێتە نێو ئاوەکەوە. دواتر باوکی و عەبدولعەزیزی برای، کە تەمەنی 13 ساڵ بوو، بۆ رزگارکردنی دەچنە ئاوەکەوە، بەڵام هەرسێکیان دەخنکێن.
هەر لە سەرەتای رووداوەکەوە، تیمەکانی بەرگریی شارستانی و ژمارەیەک گەنجی خۆبەخشی گوندی بۆگد، سەرەڕای کەمیی کەرەستە، دەستیان بە گەڕان کردووە و تاوەکو ئێستا توانیویانە تەرمی باوکەکە و یەکێک لە کوڕەکانی بدۆزنەوە.
رەوا عەبدوڵڵا، یەکێک لە گەنجە خۆبەخشەکان بە رووداوی گوت: "دوو تەرممان دۆزیوەتەوە و کۆڵنادەین تاوەکو تەرمی سێیەمیش نەدۆزینەوە."
دکتۆر خالید رەشید، باوکی سێ کوڕ بوو، دانیشتووی شاری بەغدا بوو و پێشتر مامۆستای زانکۆی کۆیە بووە.
گوندی بۆگد دەکەوێتە سنووری شارۆچکەی ئاشتی لە قەزای کۆیە. بەهۆی تێپەڕبوونی زێی بچووک بەنێویدا، بووەتە شوێنێکی گەشتیاری و لە بۆنە و پشووەکاندا خەڵکێکی زۆر رووی تێدەکەن.
.jpg&w=3840&q=75)
