| رووداو.نێت

گالەری

لە هەولێر بەردی بناخەی بەرزترین تاوەر لەسەر ئاستی کوردستان و عێراق دادەنرێت

27-01-2020

14 Photos

بڵند تاهیر @Bilindtahir

رۆژی یەکشەممە 26-01-2020 بەردی بناخەی پرۆژەی زانیاری (تاوەریE1) کە بەرزترین تاوەرە لەسەر ئاستی کوردستان و عێراق دانرا.

راپەر وەلی دەباغ، ئەندازیاری تەلارسازی و دیزاینەری تاوەرەکە بە رووداوی راگەیاند: "تاوەرەکە بەشێوازێکی سەردەمیانە و جیاواز دیزاینی بۆ کراوە و بەشی سەرەوەی تاوەرەکە وەک دەرگای قەلای هەولێر دیزاینکراوە".

راپەر وەلی دەباغ لەبارەی تاوەرەکەوە گوتی: "بەرزییەکەی 180 مەترە و لە 48 نهۆم پێکدێت، 400 شووقەی نیشتەجێبوون و بازرگانی لە خۆدەگرێ، هه‌روەها نزیکەی 450 شوێنی وەستانی ئۆتۆمبیلی هەیە. تاوەرەکەش رووپۆش دەکرێ بە جۆرها رووناکی تاوەکو شەوان لە ئاسمانی هەولێر بدرەوشێتەوە".

بەگوتەی دیزاینەری تاوەرەکە "پرۆژەکە لەسەر دەستی کۆمپانیای ناوخۆیی ئەنجامدەدرێت و دەبێتە یەکێک لە پڕۆژە دیار و ناوازەکانی پایتەختی هەرێمی کوردستان کە دەکەوێتە سەر شەقامی 60 مەتری. هەیکەلەکەی لەماوەی 20 مانگ تەواو دەبێت و بەگشتی ماوەی 3 ساڵی بۆ دانراوە بۆ تەواوبوونی تاوەکو ئێستاش 25%ـی کارەکانی پرۆژەکە تەواو بووە".