بەرپرسێکی مافی مرۆڤی نەتەوە یەکگرتووەکان سەردانی تاران دەکات

 

 

نووسینگەی مافی مرۆڤی نەتەوە یەکگرتووەکان دەڵێت، کۆماری ئیسلامیی ئێران رەزامەندی دەربڕیوە نەدا ئەلنەشیف، جێگری کۆمیساری باڵای مافی مرۆڤی نەتەوە یەکگرتووەکان لە 03-02-2024 سەردانی تاران بکات. ئەو نووسینگەیە دەڵێت، ئەلنەشیف لەبارەی پرسەکانی لەسێدارەدان و مافی ژنان سەردانی ئێران دەکات.

 

ئەو سەردانە لە کاتێکدایە ئێران تاوەکو ئێستا رێگەی نەداوە، ریپۆرتەری نەتەوە یەکگرتووەکان بۆ پرسی مافی مرۆڤ لە ئێران و هەروەها ئەندامانی لیژنەی دەرخستنی راستییەکان لەبارەی خۆپێشاندان و ناڕەزاییەکانی دوای گیانلەدەستدانی ژینا ئەمینی سەردانی ئەو وڵاتە بکەن.

 

دوای بڵاوبوونەوەی هەواڵەکە، ژمارەیەکی زۆر چالاکڤانی مافی مرۆڤی و سیاسیی ئێران لە نامە و پەیامی جیاوازدا داوا دەکەن نەدا ئەلنەشیڤ سەردانەکەی بۆ ئێران هەڵبوەشێنێتەوە.

 

شیرین عیبادی، چالاکڤانی مافی مرۆڤ و براوەی خەڵاتی ئاشتیی نۆبڵ لە نامەیەکدا بۆ کۆمیساریای باڵای مافی مرۆڤی نەتەوە یەکگرتووەکان دەڵێت، کۆماری ئیسلامیی ئێران دەیەوێت بە رێگەدان بە چوونی نەدا ئەلنەشیف گوشارەکانی سەر ئەو وڵاتە کەمبکاتەوە و وا پێشان بدات، هاوکاری دامەزراوە نێودەوڵەتییەکان دەکات.

 

داواش دەکات، جێگری کۆمیساریای باڵای مافی مرۆڤی نەتەوە یەکگرتووەکان سەردانی تاران نەکات و ئەگەریش ناچار بوو سەردانەکە بکات، لەچک لەسەر نەکات و جگە لە بەرپرسان لەگەڵ خەڵکی ئاسایی، کەسوکاری قوربانییەکان وەکو خێزانی ژینا ئەمینی کۆببێتەوە. هەروەها سەردانی گرتووخانەکان بکات و چاوی بە بەندکراوانی سیاسی بکەوێت.

 

نووسینگەی مافی مرۆڤی نەتەوە یەکگرتووەکان لە وەڵامی ئەو داواکارییانەدا رایگەیاندووە، "ئەو نووسینگەیە پێیوانییە قسە نەکردن لەگەڵ بەرپرسانی ئێران هاوکار بێت بۆ چارەسەرکردنی ئەم دۆخەی لەئارادایە".