کوردستان
هەڵاتنی ژمارەیەک چەکدار دوای ئەوەی شەڕڤانان رووبەڕوویان بوونەوە. ئەم هێرشە دوێنێ بوو بۆ روونکردنەوە لەسەر ئەم هەواڵە دانراوەتەوە
رووداو دیجیتاڵ
ناوەندی راگەیاندنی هێزەکانی سووریای دیموکرات، لەبارەی دوایین پەرەسەندنە مەیدانییەکانی کۆبانی راگەیێندراوێکی بڵاوکردەوە و دەڵێت، "گرووپە چەکدارەکانی سەر بە دیمەشق هێرشی چڕیان لە چەند قۆڵێکەوە کردووە."
ئەمڕۆ دووشەممە، هەسەدە رایگەیاند، لە کاژێر 02:00ی بەرەبەیانی ئەمڕۆوە، گرووپە چەکدارەکانی سەر بە دیمەشق هێرشی چڕیان لە چەند قۆڵێکەوە کردووەتە سەر شارۆچکەکانی خەراب عەشک و جەلەبیە لە باشووری رۆژهەڵاتی کۆبانی. هێرشەکان هاوکات بوون لەگەڵ تۆپبارانێکی سەختی گەڕەکەکان و دەوروبەری ئەو دوو شارۆچکەیە.
بەپێی راگەیێندراوەکە، لە ئەنجامی ئەو هێرشانەدا پێکدادانی تووند لەنێوان هەسەدە و گرووپە هێرشبەرەکان دروستبووە. "تاوەکو ئێستاش شەڕ بەردەوامە، بەتایبەت لە شارۆچکەی جەلەبیە."
هەروەها ئاماژە بەوە کراوە کە ئەو گرووپانە هێزی پشتیوانیی وەک تانک و زرێپۆشیان هێناوەتە ناوچەکە، هاوکات "فڕۆکەی بێفڕۆکەوانی تورکیاش بە چڕی لە ئاسمانی ناوچەکەدا دەفڕن."
هەسەدە دەڵێت، ئەم هێرشانە تەنیا لە دووەم رۆژی کاراکردنی رێککەوتنی ئاگربەست ئەنجامدراون، ئەمەش "پێشێلکردنێکی ئاشکرای رێککەوتنەکەیە" و دەیسەلمێنێت دیمەشق پابەندی بەڵێنەکانی نییە و بەردەوامە لە تێکدانی سەقامگیریی ناوچەکە.
لە کۆتایی راگەیێندراوەکەدا هاتووە: "هێزەکانمان مافی رەوای بەرگری لەخۆکردن بەکاردەهێنن. دیمەشق بە بەرپرسیاری تەواوی ئەم پێشێلکارییانە و لێکەوتە مرۆیی و ئەمنییەکانی دەزانین." هەروەها داوا لە لایەنە گەرەنتییەکانی رێککەوتنەکە کراوە بەپەلە هەڵوێستیان هەبێت بۆ راگرتنی هێرشەکانی دیمەشق.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ