زیاد ئەسعەد بە بەرهەمێکی نوێ بێدەنگی دەشکێنێت
رووداو- هەولێر
دەمێکە هیچ بەرهەمێکی نوێی هونەرمەندی ناوداری کورد زیاد ئەسعەد نابیسترێت. رووداو لە زاری عەبدولغەفار عەبدوڵڵا، بەڕێوەبەری کارە هونەرییەکانی ئاشكرایدەکات، ئێستا جگە لەوەی کار بۆ چەند هونەرمەندێک دەکات و زیاد ئەسعەد بە بەرهەمێک ئەو بێدەنگیە دەشکێنێ.
رووداو گرتەیەکی ڤیدیۆی شاعیری ناوداری کورد شێرکۆ بێکەس لەبارەی زیاد ئەسعەدەوە بۆ یەکەمجار بڵاودەکاتەوە، تێیدا باس لە زیاد ئەسعەد دەکات و بە هونەرمەندێکی "تاسەشکێن" ناویدەبات.
شیرکۆ بێکەس زۆر سەرسامی تێکستی گۆرانییەکانی هونەرمەند زیاد ئەسعەد بووە، بۆیە پێیوایە شیعری گۆرانییەکانی زۆر روون و بێگرێن و زوو دەگەنە دڵی خەڵک.
زیاد ئەسعەد لە ساڵی 1983 دەستی بەکاری هونەری کرد. لە ساڵی 1993 باشووری کوردستان جێدەهێڵێت و روودەکاتە ئەوروپا، تاوەکو ئێستا نەگەڕاوەتەوە. زیاتر لە 140 گۆرانی و تێکستی داوەتە هونەرمەندانی کورد، خاوەنی 120 گۆرانییە و لە ساڵی 2004ـەوە هیچ گۆرانییەکی بڵاونەکردووتەوە.