رووداو - کۆبانێ
کاروانی سێیەمی هێزی پێشمەرگە، کە 150 پێشمەرگە بوون، لەڕێی فڕۆکەخانەی نێودەوڵەتی هەولێرەوە گەیشتنەوە باشووری کوردستان.
ئەم کاروانەی هێزی پێشمەرگە 35 رۆژ لە کۆبانێ بوون و دوای گەیشتنی کاروانی چوارەم بە کۆبانێ، ئەمڕۆ گەڕانەوە. بەڵام ئەوانەی گەڕاونەتەوە ئێستا 149 پێشمەرگەن، چونکە یەکێکیان لە کۆبانێ شەهید بوو.
كاروانی یەكەمی هێزی پێشمەرگە لە 28 ی تشرینی یەكەمی 2014 لە هەولێرەوە بەرەو كۆبانێ بەڕێكەوت، ماوەی 35 رۆژ لەوێبوون پاشان گەڕانەوە، كاروانی دووەمیش لە 3 ی كانوونی یەكەمی 2014 بەڕێكەوت، كاروانی سێیەمیش 15-1-2015 بەڕێكەوتبوون.
ئەو پێشمەرگانەی لەماوەی رابردوودا چوونە کۆبانێ رۆڵی کاریگەریان هەبوو لە گۆڕینی باڵانسی شەڕ لەنێو شارەکە، ئەم کاروانەی چوارەمیش شەڕی دەرەوەی کۆبانێ دەکەن و هاوشانی شەڕڤانان دەجەنگن بۆ کۆنترۆڵکردنەوەی گووندەکانی سنووری کۆبانێ.
پێش ئەوەی کاروانی چوارەمی پێشمەرگە بەڕێبکەوێ، ئەنوەری حاجی عوسمان، بریکاری وەزارەتی پێشمەرگە لە کۆنگرەیەکی رۆژنامەوانیدا لە وەڵامی پرسیاری پەیامنێری رووداودا گوتی: "ئەم هێزەی پێشمەرگە مژدەی سەرکەوتنی یەکجاریی دەهێننەوە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ