هەڵەیەک روویدا! دووبارە هەوڵبدە
کوردستان
دیمەنی لەنگەی هەولێر لە ئاسمانەوە لە پاش نزیکەی 10 کاژێر لە کۆنترۆڵکردنی ئاگرەکە. وێنە: بڵند تاهیر - رووداو
رووداو دیجیتاڵ
گوتەبێژی بەرگری شارستانی هەولێر دەڵێت، 15%ـی دووکانەکانی بازاڕی لەنگە سووتاون، کە لەنێوان 150 بۆ 200 دووکانن.
ئەمڕۆ چوارشەممە، كاروان میراودەلی، گوتەبێژی بەرگریی شارستانیی هەولێر بە تۆڕی میدیایی رووداوی راگەیاند، لە ئاگرەکەی بازاڕی لەنگەدا توانیویانە 85%ـی دووکانەکان لە سووتان بپارێزن.
ئاگرەکەی بازاڕی لەنگە دوێنێ نزیک کاژێر 07:15ـی ئێوارە کەوتەوە. گوتەبێژی بەرگری شارستانی هەولێر دەڵێت، تاوەکو ئێستا هۆکاری ئاگرەکە نازانن و بۆ زانینی لێکۆڵینەوەیان دەستپێکردووە.
سووتانی ئەو ژمارە دووکانە لە کاتێکدایە، لە بازاڕەکەدا نزیکەی 2 هەزار و 400 دووکان هەن.
چەند کاسبکار و شایەتحاڵێک لە بازاڕی لەنگەوە بە رووداویان گوت، لەکاتی رووداوەکەدا "دزی"ی زۆریان لێکراوە.
لەوبارەیەوە بەرپرسێکی باڵای کارگێڕیی لە هەولێر بە تۆڕی میدیایی رووداوی گوت، هێزە ئەمنییەکان لیژنەیان پێکهێناوە و هەرکەس دزی کردبێت رووبەڕووی یاسای دەکەنەوە.
رووداوەکە زیانی گیانی نەبوو، بەڵام زیانێکی زۆری مادیی بە هاونیشتمانیان و کاسبکارانی بازاڕەکە گەیاند.
حکومەتی هەرێمی کوردستان لە راگەیێندراوێکدا بڵاویکردەوە، مەسرور بارزانی، سەرۆکوەزیرانی هەرێمی کوردستان ئامادەیی حکومەتی بۆ هاوکاریکردنی زیانلێکەوتووان دەربڕیوە.
بازاڕی لەنگە لەسەر شەقامی 100 مەتری هەولێرە و شوێنێکی ستراتیژی لەنێو شارەکەدا هەیە؛ لە تشرینی یەکەمی ساڵی 2018شدا ئاگر لە بازاڕەکە کەوتەوە و بەو هۆیەوە سەتان دووکان سووتان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ