ئایفۆن 13 گەیشتە هەرێمی کوردستان

بەشێک لە هاونیشتمانییان بۆ بەدەستهێنانی ئایفۆن 13، سەردانی نووسینگەکانی کڕین و فرۆشتن و بازاڕەکان دەکەن بۆ بەدەستهێنانی.

محەمەد ئیبراهیم، خاوەنی یەکێک لە نووسینگەکانی کڕین و فرۆشتنی مۆبایلە لە بازاڕی مۆبایل فرۆشانی کۆتری سەلام لە هەولێر و بە تۆڕی میدیایی رووداوی گوت، "دوو رۆژە ئایفۆنی 13 هاتووەتە بازاڕەوە و لەسەر داخوازی دەهێندرێت و دەفرۆشرێت. ئایفۆنەکە کە دوو سیمکارتە، نرخی جۆری 256 گێگا بایتەکەی 1600 دۆلارە و جۆری 128 گێگا بایتەکەی 1450 دۆلار دەبێت".

ئەو خاوەن نووسینگەیەی کڕین و فرۆشتنی مۆبایل ئاماژەی بەوەش کرد، "شێوەی شاشە و دیزاینی ئایفۆن 13 جیاوازە و خێراییەکەی زیاترە و کامێراکانی گەورەترە و گۆڕانکاریی دیکەشی تێدا کراوە".

دوای چەند هەفتەیەکی سەخت بۆ کۆمپانیای ئەپڵ کە رووبەڕووی چەندین کێشەی یاسایی بووەوە و تۆمەتباکرا بەوەی کە قورخکاری لە بازاڕی تەکنەلۆژیا دەکات، رۆژی سێشەممە 14ی ئەیلوول کۆمپانیاکە چەندین بەرهەمی نوێی نمایشکرد، لەنێویشیاندا بەرهەمی نوێی ئایفۆن 13 و ئای پاد و کاتژمێری ئەپڵ.

دوای خستنەڕووی ئەو بەرهەمە نوێیانە کۆمپانیای ئەپڵ رایگەیاند، 24ی ئەیلوول بەرهەمە نوێیەکان لە بازاڕدا دەگاتە دەستی بەکاربەران. چوار رۆژ دوای ئەوەش ئایفۆن 13 گەیشتە بازاڕەکانی هەرێمی کوردستان.

کۆمپانیای ئەپڵ لە ئایفۆنی 13 کۆمەڵێک گۆڕانکاری کردووە کە ئەوانەش بریتین لە درێژکردنەوەی تەمەنی پاتری و زیادکردنی توانای میمۆرییەکەی بۆ 1 تێرابایت. هەروەها کوالێتیی شاشە و کامێراکەشی بەراورد بە ئایفۆن 12 بەرزکردووەتەوە. لەگەڵ ئەوەشدا ئایفۆن 13 ئەستوورتر و لەڕووی کێشەوە قورسترە.

ئایفۆن 13 بە چوار قەبارەی جیاواز خرایەڕوو، ئایفۆن 13ـی ئاسایی، ئایفۆن 13ـی مینی، ئایفۆن 13ـیی پرۆ و پرۆماکس.