رووداو دیجیتاڵ
ژنێکی 40 ساڵانی دانیشتووی شاری مەریوان بەهۆی رەتکردنەوەی داواکاریی هاوژینیی پیاوێکی دراوسێیی، کوژرا. بکوژ ئەندامی سوپای پاسدارانە و داوایکردبوو، ئەو ژنە لە هاوژینەکەی جیابێتەوە و ژیانی هاوبەش لەگەڵ ئەو پێک بهێنێت.
ئەو ژنە بەناوی لەیلا عەلیڕەمایی، خەڵکی گوندی بێساران و دانیشتووی گەڕەکی جووجەسازیی مەریوان، خێزاندار و دایکی کوڕێک و کچێکە و لەگەڵ هاوژین و منداڵەکانی ژیاوە. لە کاتی رووداوەکەدا هاوژینەکەی لە ماڵەوە نەبووە و منداڵەکانیشی لە قوتابخانە بوون.
رێکخراوی مافی مرۆڤی هەنگاو لە زاری سەرچاوەیەکی ئاگادارەوە بڵاویکردووەتەوە، بکوژ بە ناوی کەیوان باسامی رۆژی یەکشەممە 26-10-2025 چووەتە بەردەم ماڵی ئەو ژنە و داوای لێکردووە لە هاوژینەکەی جیابێتەوە و شوو بەو بکات، بەڵام لەیلا عەلیڕەمایی رەتیکردووەتەوە. دوای رەتکردنەوەی داواکارییەکەی، کەیوان باسامی بە کڵاشینکۆف تەقەی لە لەیلا عەلیڕەمایی کردووە و کوشتوویەتی.
بەپێی راپۆرتەکە، کەیوان باسامی ئەندامی فەرمیی سوپای پاسدارانە و بە چەکی سوپا تەقەی لەو ژنە کردووە. بکوژ لەلایەن هێزەکانی پۆلیسی مەریوانەوە دەستبەسەر کراوە.
تەرمی لەیلا عەلیڕەمایی رۆژی دووشەممە لە گۆڕستانی دارسێرانی مەریوان بەخاک سپێردرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ