لە سنە دەست بەسەر دوو تۆن گۆشتی ئەسپدا گیرا

شەوی دووشەممە 28ی نیسانی 2025 کامبیز رۆستەمنیا، بەڕێوەبەری پۆلیسی شاری قوروە رایگەیاند، "دوای ئەوەی زانیاریمان پێگەیشت و دوای بەدواداچوونێکی زۆر، لەلایەن هێزەکانمانەوە ناوەندێکی بێ مۆڵەتی سەربڕینی ئاژەڵ لە شارەکەدا ئاشکرا کرا."

رۆستەمنیا گوتی، دوای لێکۆڵینەوە و بەدواداچوونی وردی مەیدانی، بە هەماهەنگی لەگەڵ دەسەڵاتی دادوەری، تیمەکانی پۆلیس رەوانەی شوێنەکە کران و پشکنین بۆ شوێنەکە کرا. لەکاتی پشکنینەکەدا، دوو تۆن گۆشتی ئەسپی سەربڕدراو دەستی بەسەردا گیرا.

بە گوتەی بەڕێوەبەری پۆلیسی قوروە، لە هەمان شوێن چەندین ئەسپ و کەری زیندووش دەستیان بەسەردا گیراوە، بەر لەوەی سەرببڕدرێن.

"پێنج کەس بە تۆمەتی فرۆشتنی گۆشتی ئەسپ دەستبەسەر کراون و لە دادگە دۆسیەیان بۆ کراوەتەوە؛ سەربڕخانەکەش بە بڕیاری دادگە لەلایەن هێزەکانی پۆلیسەوە داخرا،" ئەمەش بە گوتەی رۆستەمنیا.

ئەمە چەندین جارە لە پارێزگای سنە، گۆشتی ئەسپ دەستی بەسەردا دەگیرێت و بە گوتەی بەرپرسانی پارێزگاکە، تەنیا لە ساڵی 2024دا، زیاتر لە 11 تۆن گۆشتی ئەسپ لەو پارێزگایە دەستی بەسەردا گیراوە.

رۆژی هەینی 14-03-2025، کامەران زیبا کردار، بەڕێوەبەری گشتیی ڤێتێرنەری پارێزگای سنە رایگەیاند، "لە ساڵێکدا زیاتر لە 11 تۆن گۆشتی ئەسپ لە لایەن تیمەکانمانەوە دەستی بەسەردا گیراوە و لەنێوبراوە."

زیبا کردار گوتی، "لەو ماوەیەدا 26 ئەسپی زیندووش دەستیان بەسەردا گیراوە، بەر لەوەی سەرببڕدرێن. 32 کەسیش بە تۆمەتی فرۆشتنی گۆشتی ئەسپ دەستبەسەرکراون و لە دادگە دۆسیەیان بۆ کراوەتەوە؛ دوو سەربڕخانەش داخراون."

هەروەها لە مانگی شوباتی 2024یش، خواردنگەیەک لە شاری سنەی رۆژهەڵاتی کوردستان، بەهۆی ئەوەی ئەسپی سەربڕیبوو و گۆشتەکەی فڕۆشتبوو، لەلایەن تیمەکانی بەڕێوەبەرایەتیی گشتیی دەزگەی چاودێریی بازار و سزادانی ئەو پارێزگایەوە داخرابوو و خاوەنەکەی دەستگیرکرابوو.

بەڕێوەبەرایەتی گشتیی ڤێتێرنەری پارێزگای سنە تاوەکو ئێستا چەندین جار لەبارەی خواردنی گۆشتی ئەسپەوە هۆشداری داوەتە خەڵکی پارێزگاکە و رایگەیاندووە، "خواردنی گۆشتی ئەسپ مەترسیی تووشبوون بە نەخۆشییە مەترسیدارەکانی هاوبەشی نێوان مرۆڤ و ئاژەڵ زیاد دەکات." داواشی لە خەڵک کردووە، "لە پێناو پاراستنی تەندروستی خۆیان و خێزانەکانیان خۆیان لە کڕین و خواردنی ئەم جۆرە گۆشتە بەدوور بگرن."