رووداو دیجیتاڵ
بەڕێوەبەری گشتیی گومرکی پارێزگای کرماشان دەڵێت، لە هەشت مانگی رابردوودا، بایی نزیکەی دوو ملیار دۆلار کەلوپەل لە رێگەی دەروازە سنوورییەکانی کرماشانەوە هەناردەی عێراق و هەرێمی کوردستان کراوە.
رۆژی چوارشەممە 29-11-2023، عەلی ئەسغەر عەباسزادە، بەڕێوەبەری گشتیی گومرکی کرماشان رایگەیاند، لە ماوەی هەشت مانگی رابردوودا، چوار ملیۆن و 878 هەزار و 24 تۆن کەلوپەل، کە بایی یەک ملیار و 975 ملیۆن و 903 هەزار دۆلار بووە لە گومرک و دەروازە سنوورییەکانی پارێزگاکە هەناردە کراوە.
بەگوتەی عەلی ئەسغەر عەباسزادە، بەراورد بە ساڵی رابردوو هەناردەکردنی کەلوپەل لە رێگەی دەروازە سنوورییەکانی پارێزگای کرماشان لە رووی نرخەوە 12% و لە رووی کێشەوە 10% زیادیکردووە.
بەڕێوەبەری گشتیی گومرکی کرماشان ئاماژەی بە ئاماری هاوردەکردن لە رێگەی دەروازە سنوورییەکانی پارێزگاکە کرد و رایگەیاند، لەو هەشت مانگەدا لە رێگەی گومرکەکانی کرماشان، پەروێزخان، شووشمێ و شێخ سڵەوە بڕی 10 هەزار و 844 تۆن کەلوپەل بە بەهای زیاتر لە 71 ملیۆن و 784 هەزار دۆلار هاوردەی وڵات کراوە. گوتیشی، "هاوردەکردنی کەلوپەل لە دەروازە سنوورییەکانی کرماشانەوە لە رووی نرخەوە 7% و لە رووی کێشیشەوە 6% کەمی کردووە".
بەڕێوەبەری گشتیی گومرکی پارێزگای کرماشان دەڵێت، ئەو کەلوپەلانەی کە لەو دەروازە سنوورییانەوە هەناردەکراون بریتین لە ئاسن، شیش، کاشی، سیرامیک، بەرد، بەرهەمە پلاستیکییەکان، شیرەمەنییەکان و سەوزە و میوە.
لە پارێزگای کرماشانی رۆژهەڵاتی کوردستان، چوار دەروازەی سنووری هەن کە سیانیان لەگەڵ هەرێمی کوردستانە و دەروازەیەکی سنووریش لەگەڵ ناوچەکانی دیکەی عێراقە.
دەروازە سنوورییەکانی پەروێزخان، شووشمێ و شێخ سڵە دەکەونە سنووری هەرێمی کوردستان و دەروازەی سنووری خوسرەویش دەکەوێتە سەر سنووری نێوان کرماشان و ناوچەکانی دیکەی عێراق.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ