رووداو-مێدیكاڵ نیوز تودەی
ئەم 10 خۆراكە لە ئەنجامی چەندین رووپێویی زانستیی لە ئەمریكا و ئەوروپاوە وەها نێوبراون كە هەرە تەندروستن لەنێو هەموو خۆراكەكان:
1-سێو:
سەرچاوەیەكی نایابی ماددە دژە ئۆكسێنەكانە، كە دژی ماددە رادیكاڵەكانن. ماددە رادیكاڵەكان بەنێو جەستەدا دەسووڕێنەوە و زیان لە خانە جیاوازەكانی جەستە دەدەن و رۆڵیان هەیە لە پرۆسەی پیربوون و سەرهەڵدانی چەندین نەخۆشی.
توێژینەوەیەكی زانكۆی ویلایەتی فلۆریدا دەریخستبوو ئەوانەی 6 مانگ لەسەریەك رۆژانە سێوێك دەخۆی كۆلیسترۆڵی زیانمەندیان بە راددەی 23% كەمدەكات.
توێژینەوەیەكی نوێی هۆڵەندیش دەریخستبوو خواردنی سێو ئەگەری تووشبوون بە جەڵتەی مێشك كەمدەكاتەوە.
توێژینەوەكان لەسەر ئاژەڵانیش دەریانخستووە، ئەو رەگەزانەی لە سێودا هەن و بە (پۆلیفینۆڵ) ناسراون، تەمەن درێژدەكەن.
2-بادەم:
بە چەندین رەگەزی نایاب دەوڵەمەندن، لەوانە: مەگنیسیۆم، ڤیتامین ئی، ئاسن، كالسیۆم، رایبۆفلاڤین و ریشاڵە خۆراكییەكان.
بادەم بە دۆستی دڵ و بۆڕییەكانی خوێن ناسراوە و دژی بەرزبوونەوەی چەورییە زیانمەندەكانی خوێنە. 91-94%ی ئەو چەورییەی تێیدایە، لە چەورییە بەسوودەكانە.
توێژینەوەكان دەریانخستووە خواردنی بادەم رۆڵی هەیە لە تەمەندرێژیی مرۆڤ.
3-برۆكلی:
بە كالسیۆم، پۆتاسیۆم، فۆلیك ئەسید، ریشاڵی خۆراكی و دژە ئۆكسێنەكانی وەك ڤیتامین سی و بێتاكارۆتینەكان و رەگەزەكانی فایتۆنیوتریەنت دەوڵەمەندە. فایتۆنیوتریونتەكان بەوە ناسراون دژی نەخۆشییەكانی دڵ، شەكرە و هەندێك جۆری شێرپەنجەن.
تەنیا 66 گرام برۆكلی پێداویستی تەواوی رۆژێكی ڤیتامین سی بۆ جەستە دابیندەكات.
4-بلوبێری:
پڕە لە ریشاڵی خۆراكی، فایتۆنیوتریەنت و دژە ئۆكسێن.
توێژینەوەیەكی زانكۆی ئۆكسفۆرد دەریخستووە ئەوانەی بلوبێری (یان تووەفەرەنگی) زۆر دەخۆن، كەمتر تووشی پووكانەوەی مێشك دەبن.
توێژینەوەیەكی دیكە دەریخستووە زۆر خواردنی بلوبێری ئەگەری بەرزبوونەوەی فشاری خوێن بە راددەی 10% كەمدەكاتەوە.
5-ماسیی چەور:
وەكوو سەلەمۆن، ساردین و جۆرە چەورەكانی ماسی.
ئەو چەورییەی لە ماسیدا هەیە بۆ تەندروستی دڵ و بۆڕییەكانی خوێن و كاركردنی هەستەدەمارەكان گرنگە. ماسییە چەورەكان بە ئۆمێگا-3 و ڤیتامین دی و ڤیتامین ئەی دەوڵەمەندن.
6-سەوزە گەڵادارەكان:
سەوزە رەنگ تۆخە گەڵادارەكانی وەك سپێناخ و كەلەرم ئەگەری تووشبوون بە شەكرە كەمدەكەنەوە.
سپێناخ بە كاڵی، یان ئەگەر كەمێك بكوڵێندرێ، سەرچاوەیەكی باشی ڤیتامین ئەی، بی، سی، ئی و كەی-یە، هەروەها بە توخمەكانی وەك سیلینیۆم، نیاسین، زینك، فۆسفۆڕ، مس، پۆتاسیۆم، كالسیۆم، مەنگەنیز و ئاسن دەوڵەمەندە.
7-پەتاتەی شیرین:
ئەمانیش بە ریشاڵی خۆراكی، بێتاكارۆتین، شەكرە ئاڵۆزەكان، ڤیتامین سی و ڤیتامین بی دەوڵەمەندن.
8-ناوكی گەنم:
ئەو بەشەی گەنمە كە تەواوی رووەكەكەی لێوە پەیدا دەبێت. بەداخەوە كاتی هاڕین ئەم بەشە وەكو پێویست ورد نابێت و بەوەش لەگەڵ لە هێڵەكدانی ئارددا ئەمیش هاوڕێ لەگەڵ توێكڵ و سۆسی ئاردەكە جیادەبێتەوە و ناگاتە نێو ئەو نانەی دەیخۆین.
ناوكی گەنم بە چەندین رەگەزی گرنگ دەوڵەمەندە، لەوانە ڤیتامین ئی، فۆلیك ئەسید، ثایامین، زینك، مەگنیسیۆم، فۆسفۆڕ و چەندین ترشە چەوری بەسوود. ئەوە جگە لەوەی بە ریشاڵی خۆراكی دەوڵەمەندە.
9-ئەڤۆكادۆ:
ئەو چەورییەی لە ئەڤۆكادۆ هەیە لە جۆرە ناتێرە بەسوودەكانی چەورییە، ئەوە جگە لەوەی دەوڵەمەندە بە ڤیتامین بی، ڤیتامین كەی، ڤیتامین ئی و هەردووجۆری تواوە و نەتواوەی ریشاڵە خۆراكییەكان.
ئەڤۆكادۆ چەوری خوێن دادەبەزێنێ و دژی خانە شێرپەنجەییەكانیشە.
10-شۆفان:
لەو 20 ساڵەی دواییدا زیاتر سەرنج خراوەتە سەر شۆفان و سوودەكانی.
توێژینەوەیەك دەریخستووە خواردنی رۆژانەی شۆفان، بەهۆی ئەو ریشاڵانەی تێیدان، چەوری خوێن دادەبەزێنێ.
شۆفان بۆ تووشبووانی شەكرە ئێجگار بەسوودە، چونكە ریشاڵە خۆراكییەكای نێوی وادەكەن خواردن لە كۆئەندامی هەرسدا بەهێواشی هەرس ببێت، هەروەها شەكرەكانی نێویشی لە جۆرە ئاڵۆزەكانن و بە لەسەرخۆیی دەچنە نێو خوێن، بەوەش نابنەهۆی بەرزكردنەوەی كتوپڕی شەكرە.
جگە لەوانە، شۆفان بە چەندین رەگەزی دیكە دەوڵەمەندە، لەوانە: ڤیتامین بی، ئۆمێگا-3، پۆتاسیۆم و فۆلیك ئەسید.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ