هەڵەیەک روویدا! دووبارە هەوڵبدە
رووداو دیجیتاڵ
وەزیری دەرەوەی ئیسرائیل رایگەیاند، هێشتا بۆشایی و خاڵی ناکۆک لە نێوان بەرەکانی جەنگی ئێراندا ماوە و هیچ شتێک کۆتایی نەهاتووە.
رۆژی چوارشەممە، 8ی نیسانی 2026، جەدعون ساعر، وەزیری دەرەوەی ئیسرائیل لەبارەی رێککەوتنی راگرتنی جەنگ بۆ دوو هەفتە لەنێوان ئەمریکا و ئێران بۆ دوو هەفتە بە میدیای فەرمی وڵاتەکەی راگەیاند، "هیچ شتێک کۆتایی نەهاتووە". دەشڵێت، "نازانم چۆن دەکرێت جیاوازییەکانی نێوان ئێران و ئەمریکا نەهێڵدرێن".
بەرەبەیانی ئەمڕۆ، دۆناڵد ترەمپ، سەرۆکی ئەمریکا رایگەیاند، بە پێشنیازێکی شەهباز شەریف، سەرۆکوەزیرانی پاکستان رازیبووە بۆ راگرتنی جەنگی وڵاتەکەی و ئیسرائیل لەگەڵ ئێراندا بۆ دوو هەفتە؛ گوتیشی، ئەوە بۆ پێدانی دەرفەتێک بووە بە دیپلۆماسی.
گوتەکانی ساعر لە کاتێکدان بە گوێرەی پێشنیازەکە دەبوو هێرشەکانی هەردوولا بۆ سەر یەکدی رابگیرێن و تەنگەی هورمزیش بکرێتەوە.
بە گوێرەی میدیای ئێران، ئەمڕۆ هێرشکراوەتە سەر وڵاتەکەیان. هەروەها، بەرپرسێکی تارانیش گوتویەتی، ئەگەر ئاگربەستەکە لوبنان نەگرێتەوە، ئەوا ئامادەی دانیشتن نین لەسەر پرسی ئاگربەست، خاڵێک کە ئەمریکا و ئیسرائیل دەڵێن، بەشێک نییە لە رێککەوتنەکە.
هەروەها بە گوێرەی دوو کۆمپانیای گواستنەوەی نەوت کە قسەیان بۆ رۆیتەرز کردووە، ئێران تەنگەی هورمزی بە تەواوی نەکردووەتەوە و بۆ تێپەڕینی کەشتییەکان داوای پارە دەکات.
بە گوێرەی سەرۆکوەزیرانی پاکستان، پێشێلکاری رێککەوتنەکە لەلایەن هەردوولاوە کراوە و داوا دەکەن لایەنەکان دانبەخۆیاندا بگرن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ