رووداو دیجیتاڵ
دادگای باڵای سعودیە داوا لە هاووڵاتییانی وڵاتەکەی دەکات، ئێوارەی رۆژی چوارشەممە 18ی ئاداری 2026، چاودێریی بینینی مانگ بکەن بۆ دیاریکردنی یەکەم رۆژی جەژنی رەمەزان.
رۆژی دووشەممە 16ی ئاداری 2026، دادگای باڵای سعودیە رایگەیاند، "دادگای باڵا داوا لە هەموو موسڵمانان لە سەرتاسەری شانشینی سعودیە دەکات، ئێوارەی رۆژی چوارشەممە، 18ی ئاداری 2026، چاودێریی بینینی هیلالی مانگی شەوال بکەن."
دادگای باڵا داوا لە هەر کەسێک دەکات کە بە چاوی ئاسایی یان بە دووربین مانگی بینی، پەیوەندی بە نزیکترین دادگاوە بکات و شایەتییەکەی تۆمار بکات، یان پەیوەندی بە نزیکترین ناوەندەوە بکات بۆ ئەوەی هاوکاری بکەن لە گەیشتن بە دادگا.
دادگای باڵا هیوا دەخوازێت ئەو کەسانەی توانای بینینی مانگیان هەیە، بایەخ بەم بابەتە بدەن و بچنە پاڵ ئەو لیژنانەی لە ناوچە جیاوازەکان بۆ ئەم مەبەستە پێکهێندراون.
لە بەشێک لە وڵات و ناوچەکان رۆژی چوارشەممە 29ی مانگی رەمەزانە، لە هەندێکێشیان 28، ئەگەر لێژنەکان لە سعودیە مانگ ببینن، رۆژی پێنجشەممە یەکەم رۆژی جەژنی رەمەزان دەبێت.
لە هەرێمی کوردستانیش رۆژی چوارشەممە 29ی مانگی رەمەزانە و وەزارەتی ئەوقاف لە رێگەی لیژنەی تایبەتمەندەوە چاودێری بینینی مانگ دەکات.