ئەردۆغان بۆ رووداو: بەمنزیکانە لەگەڵ دەم پارتی کۆدەبمەوە

 

رەجەب تەیب ئەردۆغان، سەرۆککۆماری تورکیا، رۆژی سێشەممە، لە وەڵامی زنار شینۆ، نێردراوی رووداو بۆ لووتکەی ناتۆ لە لاهای هۆڵەندا گوتی: "پەیوەندیمان لەگەڵ هاووڵاتییانی کوردی ناوچەکەمان زۆر باشە، من وەک سەرۆککۆماریان هیچ کێشەیەکمان نییە. ئێستا هەموو شتێک زۆرباشە."

 

سەرۆککۆماری تورکیا ئاماژەی بەوەش کرد کە نوێنەرانی کورد لە پەرلەمانی تورکیا "توانا و سەنگێکی بەهێزیان هەیە" و کارەکانیان بە باشی بەڕێوەدەبەن.

 

سەبارەت بە دیدار و کۆبوونەوە لەگەڵ سیاسەتڤانانی کورد، ئەردۆغان باسی لە کۆبوونەوەیەکی پێشووی خۆی کرد لەگەڵ سری سورەییا ئۆندەر و پەروین بوڵدان و گوتی: "داوای دیداریان کردم، منیش لەگەڵیان لە نووسینگەی سەرۆکایەتیی کۆمار کۆبوومەوە."

 

هەروەها ئەردۆغان ئاشکرای کرد، کە چاوەڕێی دیداری نوێ دەکات و گوتی: "پێموایە داوای کۆبوونەوە و دیداری نوێ دەکەن و بەمنزیکانە لەگەڵیان کۆدەبینەوە. وەک گوتم هیچ کێشەیەک لە ئارادا نییە."

 

لە کۆتایی لێدوانەکەیدا بۆ رووداو، سەرۆککۆماری تورکیا جەختی لەسەر یەکپارچەیی وڵاتەکەی کردەوە و رایگەیاند: "لە وڵاتەکەم کورد، تورک، لاز، چەرکەز و عەرەب هەموومان یەکین. پاراستنی یەکپارچەیی و یەکگرتوویی ئەرکی منە. ئەمەش بە باشترین شێوە دەکەین."

 

 

 

رەجەب تەیب ئەردۆغان: پەیوەندیمان لەگەڵ هاووڵاتییانی کوردی ناوچەکەمان من وەک سەرۆککۆماریان هیچ کێشەیەکمان نییە. ئێستا هەموو شتێک زۆرباشە، لە پەرلەمان توانا و سەنگێکی بەهێزیان هەیە. ئەوانیش کە کێشەیەکی وەهایان نییە کارەکانیان بە باشی بەڕێوەدەچێت. داوای دیداریان کردم، منیش لەگەڵ خوالێخۆشبوو سری سورەییا ئۆندەر و پەروین خان لە نووسینگەی سەرۆکایەتیی کۆمار لەگەڵ هاوڕێیەکانم پێکەوە کۆبووینەوە. پێموایە داوای کۆبوونەوە و دیداری نوێ دەکەن و بەمنزیکانە لەگەڵیان کۆدەبینەوە. وەک گوتم هیچ کێشەیەک لە ئارادا نییە. لە وڵاتەکەم کورد، تورک، لاز، چەرکەز و عەرەب هەموومان یەکین. پاراستنی یەکپارچەیی و یەکگرتوویی ئەرکی منە. ئەمەش بە باشترین شێوە دەکەین.