تاران و چەند شارێکی دیکەی ئێران بە چڕی بۆردوومان کران

 

بەرەبەیانی ئەمڕۆ هەینی، 03-04-2026، دەنگی تەقینەوەی بەهێز و فڕۆکەی جەنگی لە ئاسمانی تاران و شارەکانی دیکەی وەک شیراز، ئیسفەهان و بێهبەهان بیستراوە.

 

لە تاران، هێرشێکی چڕ کرایە سەر چەند ناوچەیەکی جیاواز لەوانە؛ شەمیران، تارانپارس، قەیتەرییە، شەقامی تاڵەقانی و سادقییە. لە گرتە ڤیدیۆییەکاندا دەنگی سیستمی بەرگریی ئاسمانی و تەقینەوەی بەردەوام دەبیسترێت، بەڵام تاوەکو ئێستا زیانەکان بە فەرمی رانەگەیێندراون.

 

لە پارێزگای فارس، جارێکی دیکە هێرشکرایە سەر بنکەی تیپی 55ـی هێزە تایبەتەکانی (چەتربازان)ـی سوپای ئێران (ئەرتەش). شایەتحاڵەکان باس لەوە دەکەن کە دووکەڵ و ئاگرێکی زۆر لە شوێنی بۆردوومانەکە بەرز بووەتەوە و دەنگی فڕۆکەی جەنگی بە چڕی لە ئاسمانی شیراز بیستراوە.

 

پارێزگای خوزستانیش لە هێرشەکان بەدەر نەبوو؛ لە شاری بێهبەهان بنکەیەکی سەربازیی سوپای پاسداران بۆردوومان کرا. ئەم بنکەیە لە نزیک کێڵگەیەکی نەوت و گازە، بەڵام هێشتا روون نییە کە ئایا زیان بە کەرتی وزەی ناوچەکە گەیشتووە یاخود نا. هاوکات لە شارەکانی ئەهواز، ئابادان و خوڕەمشەهریش دەنگی تەقینەوە بیستراوە.

 

لە پارێزگای ئیسفەهان و لە کاژێر 05:10ـی بەرەبەیانی ئەمڕۆ، کۆگەیەکی تەقەمەنی لە شاری "بەهارستان" کە سەر بە سوپای پاسدارانە، بۆردوومان کرا. ئەمە لە کاتێکدایە کە پێشتریش ئەو کۆگەیانە کرابوونە ئامانج. هەروەها لە ناوچەی "سوپاهانشەهر" دەنگی چەندین تەقینەوەی بەهێز بیستراوە.

 

تاوەکو ئێستا بەرپرسانی فەرمیی ئێران هیچ ئامارێکیان لەسەر قەبارەی زیانە گیانی و ماددییەکانی ئەم هێرشە فراوانە بڵاونەکردووەتەوە.