رووداو دیجیتاڵ
رێکخراوی ناوچەی تایبەتی ئابووریی پترۆکیمیای ئێران راگەیێندراوێکی بڵاو کردەوە تێیدا هاتووە، لە ئەنجامی هێرشەکەی ئەمڕۆی ئیسرائیل و ئەمریکا بۆ سەر ناوچەکە، هیچ مادەیەکی مەترسیدار بڵاو نەبووەتەوە.
کاژێر 10:30 خولەکی بەیانیی ئەمڕۆ شەممە 04-04-2026، هێرشێکی چڕ کرایە سەر بەشێکی ناوچەی تایبەتی ئابووریی پترۆکیمیای ئێران لە پارێزگای خوزستان.
بەڕێوەبەرایەتیی ناوچە ئابووری و پیشەسازییەکە لە راگەیێندراوێکدا هێرشەکەی پشتڕاست کردەوە و رایگەیاند، بە بڕیاری لیژنەی فەرماندەیی دۆخی لەناکاو، سەرجەم یەکە پیشەسازییەکان چۆڵکراون.
بەگوێرەی راگەیێندراوەکە، لە ئەنجامی هێرشەکەدا هیچ مادەیەکی مەترسیدار بڵاونەبووەتەوە و مەترسی نەخستووەتە سەر شارەکانی دەوروبەر.
ناوچەکە لە کەناراوەکانی کەنداوە و سەر بە ماهشەهری خوزستانە. رووبەرەکەی نزیکەی دوو هەزار و 850 هێکتارە و بە مەبەستی گەشەپێدانی پیشەسازیی پترۆکیمیایی و ئاسانکاری بۆ بازرگانی و هەناردەکردن دروست کراوە.